चुनाव आफ्नो पक्षमा पार्न मदिराको सहारा, नेकपा प्यानलबाट उम्मेदवार बनेर काँग्रेस नेताको समर्थन ?

असोज २७, २०७६ | आजको अर्थ
ajaako_artha

काठमाडौं । अहिले विश्वभरका गैरआवासीय नेपाली काठमाडौंमा भेला भएका छन् । मंगलबारदेखि गैरआवासीय नेपाली संघको नवौँ विश्व सम्मेलन हुन लागेकाले विश्वभरका एनआरएन प्रतिनिधि काठमाडौंमा भेला भएका हुन् । 
मंगलबारदेखि तीन दिनसम्म चल्ने विश्व सम्मेलनबाट नेतृत्व चयन गरिने हुँदा उम्मेदवारहरुले मतदातालाई आफ्नो पक्षमा पार्न अनेकन उपायहरु अबलम्बन गरिरहेका छन् ।  हुन पनि विश्वभरबाट छानिएर आएका २५०० प्रतिनिधिले जम्मा ४२ जनाको कार्यसमिति चयन गर्नुपर्ने हुन्छ । त्यसमा नेतृत्वमा दाबी गर्नेमात्रै दुई सयको हाराहारीमा छन् । यसरी चर्को प्रतिस्पर्धा भएको एनआरएनमा मतदातालाई आफ्नो पक्षमा पार्न अनेकन प्रयास गर्नु नौलो होइन । त्यसमा मत किनबेचदेखि मतदाता रिझाउन अनेकन ‘फन्डा’ भइरहेको छ । 

यसैक्रममा कोषाध्यक्षमा उम्मेदवार महेश कुमार श्रेष्ठलेपनि मतदाता रिझाउन मदिराको सहारा लिएका छन् । उनले सोमबार राति ललितपुरको कुपन्डोलस्थित होटल हिमालयमा मदिरासहितको भव्य भोजको आयोजना गरेका हुन् । सो भोजमा एनआरएन प्रतिनिधिका साथै उम्मेदवारहरुलाई बोलाइएको थियो । करीब ५०० जनाको लागि निम्ता दिइएको भएपनि हजार जना भन्दा बढी सहभागि भएपछि आयोजकलाई

भीड व्यवस्थापन गर्नै हम्मेहम्मे परेको थियो । पेय पदार्थको रुपमा वियरदेखि महंगा ह्वीस्कीसम्मको व्यवस्था गरिएको पार्टीमा मदिराको अत्याधिक खपत भएको एक सहभागीले आजको अर्थलाई बताए । 

उनका अनुसार आयोजकले अनुमान गरेर ल्याएको मदिराले नपुगेपछि पटक पटक तनाव भएको थियो । एक  नेपाली व्यवसायी भन्दै थिए–एनआरएनको मदिरा पियाइ चै चकित पार्ने हुँदो रैछ । आयोजकलाई नै हायल कायल पार्ने गरी खाइदिए ।

पाहुनाका लागि तयार राखिएको बारमा अत्याधिक मदिरा खपत भएपछि आयोजकले पटक पटक बाहिरबाट मदिरा मगाउनु परेको थियो । सुरुमा ब्ल्याक लेबलसहितको महंगा मदिराको व्यवस्था गरिएको भएपनि माग धान्नै नसकिने गरी खपत भएपछि पछि अर्ल्ड दरबारदेखि सस्तो गुणस्तरको मदिरा ल्याएर काम चलाइएको स्रोतको भनाई छ । 

कोषाध्यक्षका उम्मेदवार श्रेष्ठ सिटी मनि एक्सप्रेस जापानका अध्यक्ष तथा प्रमुख कार्यकारी अध्यक्ष हुन् । काँग्रेस निकट मानिने उनी नेकपा निकट मानिने कुमार पन्त समूहबाट चुनाव लड्न लागेका हुन् । उनै श्रेष्ठको पक्षमा माहोल खडा गर्न सिटी एक्सप्रेसको संस्थागत सहयोगमा श्रेष्ठले भोज आयोजना गरेका हुन् । 

रोचक त के छ भने नेकपा प्यानलबाट कोषाध्यक्ष लडेपनि श्रेष्ठको मदिरामय पार्टीमा काँग्रेस नेताहरुको समेत बाक्लो उपस्थिति देखिन्थ्यो । सो पार्टीमा काँग्रेस नेता रामचन्द्र पौडेल, नेताहरु प्रकाशशरण महत, बालकृष्ण खाँड लगायतको सहभागिता रहेको थियो । 

कुमार पन्त टिमबाट औसत उम्मेदवार मानिने श्रेष्ठले मदिराले प्रतिनिधिलाई झम्म बनाइदिएपनि भोट भने आउला नआउला त्यो भने हेर्न बाँकी नै छ ।  
यद्यपि कुमार पन्त टीमलाई कडा टक्कर दिनेगरी कूल आचार्यले पनि प्यानल सहित उम्मेदवारी दिने घोषणा गरेपछि पन्त तनावमा रहेको बताइन्छ । एक महिनाअघि नै निकै तामझामका साथ उम्मेदवारी घोषणा गरेका पन्त अहिले आचार्य आक्रामक रुपमा मैदानमा आएपछि रक्षात्मक अवस्थामा पुगेको एनआरएनभित्र चर्चा छ । 
 

कमेन्ट गर्नुहोस्

तपाईंको ईमेल गोप्य राखिनेछ ।

This site is protected by reCAPTCHA and the Google Privacy Policy and Terms of Service apply.

बुलियन मार्केट

विनिमय दर

मुद्राखरिदबिक्री
U.S. Dollar११४.५२११५.१२
European Euro१२६.९४१२७.६०
UK Pound Sterling१४८.१६१४८.९४
Swiss Franc११५.६५११६.२६
Australian Dollar७७.९७७८.३८
Canadian Dollar८६.०९८६.५४
Singapore Dollar८४.१३८४.५७