दुई नगरपालिकामा ५ वटा पक्की पुल बनाउन प्रदेशबाट आधा अर्ब बजेट

४ बर्ष अगाडि

पश्चिम नवलपरासीकाे २ वटा नगरपालिकामा पक्की पुल बनाउन प्रदेश ५ ले झण्डै आधा अर्ब बजेट छुट्याएको छ । सुनवलको बेलारी खोला, वनकट्टी र छडेनी जोड्ने झरही खोला तथा रामग्रामको देउरवा र रामग्राम स्तूप जोड्ने झरही खोलामा ५ वटा पुल बनाउन साे रकम छुट्याइएकाे प्रदेश भौतिक पूर्वाधार विकासमन्त्री बैजनाथ चौधरीले जानकारी दिए ।  

पुल निर्माणकाे लागि ठेक्का प्रकृया सम्पन्न भइ तीनवटाको शिलान्यास तयारी भएको उनले बताए । चाैधरीका अनुसार अन्य दुईवटा पुल पनि ठेक्का प्रक्रियामा रहेकाले चैतमा शिलान्यास हुनेछन् । 

मन्त्रालयका अनुसार रामग्राम नगरपालिका–७ स्थित देउरवा गाउँ र गौतम बुद्धको अस्तुधातु रहेको स्थल रामग्राम स्तूप जोड्ने गरी झरही खोलामा पुल निर्माण हुनेछ । 

यो पुलले रामग्राम नगरपालिकाको बैकुण्ठपुरदेखि उजैनी गाउँलाई जोड्नेछ । यहाँ पुल निर्माण भएपछि पूर्वपश्चिम राजमार्गको हरकट्टादेखि सिधै रामग्राम स्तूप पुग्न सहज हुने मन्त्री चौधरीले जानकारी दिए । 

यहाँ पुल नहुँदा बर्सातको समयमा स्थानीय देउरवा गाउँका बासिन्दालाई सदरमुकाम परासी आवातजावत गर्न तथा उजैनी गाउँमा अध्ययन गर्न आउन–जानका लागि विद्यार्थीलाई समस्या रहेको स्थानीयवासी शम्भु उपाध्यायले जानकारी दिए । 

“वर्षांदेखि यहाँ पुल नहुँदा हामीलाई धेरै समस्या थियो, विद्यार्थी पढाइ नै छोडेर बस्नुपर्ने अवस्था पनि छ, किनमेल तथा अन्य कामका लागि पनि वैकल्पिक लामो दूरी यात्रा गर्नुपर्ने बाध्यता थियो, अहिले पुल निर्माण हुन लागेपछि यहाँ खुशियाली नै छाएको छ”, उनले भने । 

३५ मिटर लम्बाइको उक्त पुल निर्माणका लागि भ्याटसहित रु ६ करोड ६२ लाखमा एम÷एस आसियाटिक र प्रदीप जुम्ली जेभी कम्पनीले निर्माणको जिम्मा पाएको छ ।  

रामग्राम नगरपालिकाकै घिनाहा र शुक्रौली जोड्ने गरी तुरिया खोलामा पनि मोटरेबल पुल निर्माण हुँदैछ । यहाँ पुल निर्माणका लागि रु १२ करोड बजेट विनियोजन गरिएको छ । पुल निर्माणका लागि ठेक्का प्रक्रिया शुरु भइसकेको जनाइएको छ । 

यस्तै सुनवलमा तीनवटा पुल निर्माण हुनेछन् । सुनवल बजारदेखि पर्यटकीयस्थल महलपोखरी जोड्ने गरी बेलारी खोलामा मोटरेबल पुल निर्माण हुनेछ । 

यो पुलका लागि रु एक करोड ५० लाख बजेट विनियोजन गरिएको छ । यहाँ पुल निर्माण भएपछि स्थानीय बासिन्दालाई सुनवल बजार आवत–जावत गर्न तथा महलपोखरी पुग्ने पर्यटकलाई सहज हुने सुनवल नगर उपप्रमुख दधिराम अर्यालले जानकारी दिनुभयो । यो पुलले नवलपरासी र पाल्पाको पहुँचलाई पनि विस्तार गर्नेछ ।  

 सुनवलकै वनकट्टी र छडेनी जोड्ने गरी झरही खोलामा पुल निर्माण हुनेछ । यसका लागि रु तीन करोड बजेट विनियोजन गरिएको जनाइएको छ । यहाँ पुल निर्माण भएपछि वनकट्टीका बासिन्दालाई परासी आवत–जावत गर्न तथा छडेनीका बासिन्दालाई सुनवल नगरपालिका आउन–जान सहज हुनेछ भने छडेनीबाट वनकट्टी पढ्न जाने विद्यार्थीलाई सहज हुनेछ ।

पुल नहुँदा बर्सातको समयमा वनकट्टी पढ्न जानुपर्ने विद्यार्थी तीन महिना पढाइबाटै वञ्चित हुनु परेको बताउँदै स्थानीयवासी लतिदुन नेसाले भने, “ अहिले हामी धेरै खुशी छौँ, अब यी समस्या समाधान हुने आश छ ।”  

प्रदेश सरकारले यसै वर्ष सुनवलको खुटहट र रामग्रामको डैनहवा जोड्ने गरी तुरिया खोलामा पनि पुल निर्माण गर्ने जनाएको छ । यो पुलका लागि पनि रु १२ करोड बजेट विनियोजन गरिएको मन्त्रालयले जनाएको छ ।     

४ बर्ष अगाडि

प्रतिक्रिया