चीनले नेपालसँग सीमाना जोडिएका नाका तत्काल खुल्न नदिने भएको छ । १० दिन अघिदेखि नेपालले रसुवागढी र तातोपानी नाका खोलेर सामान ल्याउने भनेपनि चीनले तत्काल नाका खुल्न नदिने भएको हो ।
नेपालमा कोरोना संक्रमण देखिएको भन्दै चिनियाँ अधिकारीहरुले नाका खोल्न नदिने बताएका हुन् । चीनको केरुङ प्रशासनले नयाँ नीतिअनुसार तत्काल नाका सञ्चालन हुननसक्ने जानकारी गराएको रसुवागढी भन्सार प्रमुख पुण्यविक्रम खड्काले बताए ।
सरकारे १० दिनअघि चीनतर्फका नाका खुला गर्ने घोषणा गरेको थियो । तर चिनियाँ अधिकारीहरुले भारतमा तीब्र गतिमा कोरोना संक्रमण देखिएको र नेपालमा पनि संक्रमित फेला परेकोले चीन नाका खोल्न अनिच्छुक देखिएको तातोपानी भन्सार प्रमुख लालबहादुर खत्रीले बताए ।
सरकारले चैत १२ गते चीनमा कोरोना फैलिएपछि माघ १५ गतेदेखि बन्द गरिएको व्यपारिक नाका खुला गर्ने निर्णय गरेको थियो ।
यस्तो बेला सरकारी तहबाट कुननीतिक पहल गर्नुपर्ने बेइजिङ्ग स्थित नेपाली राजदुतावास खाली छ । सरकारले चीनका लागि नेपाली राजदूत लीलामणि पौडेललाई फिर्ता बोलाएर महेन्द्रबहादुर पाण्डेलाई नयाँ राजदूत सिफारिस गरेको छ ।
तर संकट समाधान र सहयोग आदानप्रदानको लागि चाँडै नियुक्तिको प्रकृया भने पूरा गरेको छैन । जसका कारण नाका खुलाउन नेपालका तर्फबाट सिमा जोडिएका जिल्लाका प्रमुख जिल्ला अधिकारीहरु तथा भन्सार प्रमुखहरुले मात्र आफूसक्दो पहल गरेका छन् ।
प्रतिक्रिया