काठमाडाैं- पोखरा रंगशालामा जारी २४औं आहा रारा पोखरा गोल्डकप फुटबल प्रतियोगितामा चर्च ब्वाइज फुटबल क्लबले रोमाञ्चक जित निकाल्दै सेमिफाइनल यात्रा तय गरेको छ। डिफेन्डिङ च्याम्पियन त्रिभुवन आर्मी क्लबलाई १–० गोल अन्तरले पराजित गर्दै चर्च ब्वाइजले उपाधि यात्रालाई थप सशक्त बनाएको छ।

पहिलो हाफ गोलरहित बराबरीमा सकिएपछि दोस्रो हाफमा दुवै टोलीले गोल गर्ने अवसर सिर्जना गरे पनि त्यसलाई सदुपयोग गर्न सकेनन्। खेल सकिन मात्र एक मिनेट बाँकी रहँदा चर्च ब्वाइजका नवीन लामाले प्रहार गरेको कर्नर बललाई राज भुसालले शक्तिशाली हेडमार्फत जाली चुमाउँदै टोलीलाई अग्रता दिलाए। यही गोल नै खेलको निर्णायक बन्यो, जसले चर्च ब्वाइजलाई अन्तिम चारमा प्रवेश गरायो।

गत संस्करणको च्याम्पियन आर्मी क्लब यस पटकको प्रतियोगिताबाट पहिलो खेलमै बाहिरिन बाध्य भयो। सिधै क्वाटरफाइनलमा प्रवेश पाएको आर्मी क्लब चर्च ब्वाइजको आक्रामक खेल रणनीतिलाई तोड्न असफल रह्यो। चर्च ब्वाइजले एनआरटीलाई पराजित गर्दै क्वाटरफाइनलमा स्थान बनाएको थियो।

चर्च ब्वाइजका प्रशिक्षक चेतनारायण श्रेष्ठले खेलाडीहरूको मेहनत, लगनशीलता र सामूहिक खेल शैलीकै कारण महत्वपूर्ण जित सम्भव भएको बताउनुभयो। आर्मीका प्रशिक्षक मेघराज केसीले खेलाडीले उत्कृष्ट प्रदर्शन गरे पनि अवसर सदुपयोग गर्न नसक्दा हार ब्यहोर्नु परेको प्रतिक्रिया दिनुभयो।

प्रतियोगिताको विजेताले नगद १२ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले ६ लाख रुपैयाँसहित शिल्ड, मेडल र प्रमाणपत्र प्राप्त गर्नेछ। साथै, प्रतियोगिताको सर्वोकृष्ट खेलाडीलाई स्कुटर पुरस्कार प्रदान गरिनेछ।

त्यस्तै, सर्वाधिक गोलकर्ता, उत्कृष्ट डिफेन्डर, गोलरक्षक, मिडफिल्डर, स्ट्राइकर तथा प्रशिक्षकलाई जनही २५ हजार नगद पुरस्कारसहित ट्रफी प्रदान गरिने आयोजकले जनाएको छ।

अब चर्च ब्वाइज सेमिफाइनलमा प्रवेश गरिसकेको छ। के उनीहरूले फाइनल यात्रा तय गर्दै उपाधि उचाल्न सक्लान् त? खेलप्रेमीहरू उत्साहित छन्, अब सेमिफाइनलका लागि उत्सुकता चरमचुलीमा पुगेको छ।