काठमाडौं - बलेफी हाइड्रोपावर लिमिटेडले भोलिदेखि आफ्नो अवितरित १७ लाख ९८ हजार ६५६ कित्ता शेयर बिक्री गर्न लागेको छ।

कम्पनीले संस्थापक समूहको ६ लाख ७६ हजार १९१ कित्ता, सर्वसाधारण समूहको लकइनमा रहेका ५ लाख ८ हजार ८९२ कित्ता र सर्वसाधारणकै तर लकइनमा नरहेका ६ लाख १३ हजार ५७३ कित्ता शेयर उपलब्ध गराउने जनाएको छ। लकइन अवधि आउँदो चैत २९ गते सकिने कम्पनीले बताएको हो ।

सेयर बिक्रीका लागि न्यूनतम मूल्य प्रतिकित्ता १०० रुपैयाँ तोकिएको छ।  सेयर किन्नका लागि आवेदन दिँदा घटीमा १०० कित्ता र बढीमा १० ले निःशेष भाग जाने गरी सम्पूर्ण कित्ता खरिदका लागि आवेदन दिन सकिनेछ ।

यस शेयरमा सर्वसाधारण लगायत इच्छुक जो कोही व्यक्ति, संघसंस्था वा कम्पनीले आवेदन दिन सक्नेछन्। आवेदन दिने अन्तिम मिति फागुन १९ गते रहेको छ । इच्छुक लगानीकर्ताले आफूले किन्न चाहेको शेयर संख्या र सोको मूल्य समेत तोकेर गोप्य शिलबन्दी बोलपत्र पेस गर्नु पर्नेछ।

यस्तो बोलपत्र फाराम एनआइएमबि एस क्यापिटल लिमिटेडको काठमाडौं स्थित लाजिम्पाट कार्यालयका साथै चिप्लेढुंगा, ट्राफिकचोक, आदर्शनगर, गोल्छाचोक शाखा कार्यालयमा पाइनेछ।