काठमाडाैं- कैलालीको गौरीगंगा नगरपालिका-१ र वडा नम्बर २ जोड्ने चौमाला खोलामा निर्माणाधीन मोटरेबल पुल पाँच वर्ष पुग्न लाग्दा पनि सम्पन्न हुन सकेको छैन। निर्माण कम्पनीको लापरबाहीले गर्दा पुल अलपत्र परेको पूर्वाधार विकास कार्यालय कैलालीले जनाएको छ।

तीन वर्षमा सक्नुपर्ने पुल निर्माणको काम अझै हावा खाँदैछ। पूर्वाधार विकास कार्यालयले विसं २०७७ असार ३१ गते निर्माण कम्पनीसँग सम्झौता गरेको थियो, तर पुलको अवस्था हेर्दा ठेकेदारलाई सुत्नकै लागि सम्झौता गरेको जस्तो देखिन्छ। कार्यालयका इञ्जिनियर विनोद खड्काका अनुसार ६० मिटर लम्बाइको उक्त पुलको भौतिक प्रगति यति सुस्त छ कि आजभन्दा अघि ढुंगेयुगमा बनेका पुलहरू पनि छिटो बनेका होलान्। हालसम्म वडा नम्बर २ तर्फको एबोटमेन्ट क्याप मात्र बनेको छ भने वडा नम्बर १ तर्फको एबोटमेन्ट र बीच भागको पाइलिङ मात्र टुलुटुलु हेरिरहेको छ।

१२ करोड ७३ लाख रुपैयाँ लागत अनुमान गरिएको पुल निर्माणका लागि निर्माण कम्पनीले ७ करोड २३ लाख ८० हजार रुपैयाँमा ठेक्का लिएको थियो। अहिलेसम्म कम्पनीले २ करोड ३ लाख ४० हजार रुपैयाँ भुक्तानी लिइसकेको छ, तर परिणाम? दुईटा इँटा जोड्न समेत नसकेको जस्तो स्थिति छ।

पुल नबन्दा चौमाला बजारका स्थानीयलाई वर्षायाममा खोला पार गर्न निकै कठिनाइ हुने गरेको छ। स्थानीय सागर थापाका अनुसार, दुवै वडाका बासिन्दा सरकारी सेवा लिन र विद्यार्थी विद्यालय जान खोलो तर्न बाध्य छन्। वर्षायाममा खोला बढ्दा उनीहरूलाई तीन किलोमिटर हिँडेर वैकल्पिक बाटो अपनाउनुपर्ने बाध्यता छ। तर निर्माण कम्पनी भने आफ्नै सुस्त गतिमा समय घिसारिरहेको छ।

यस्तै, वडा नम्बर ५ अण्डैया र वडा नम्बर ९ लिक्माको बीचमा पर्ने कटैनी नदीमा ५० मिटर लम्बाइको अर्को पुल निर्माणका लागि ५ करोड २८ लाख रुपैयाँमा सम्झौता गरिएको थियो। दुई वर्षभित्र निर्माण सक्ने भनिए पनि यहाँ पनि निर्माण कम्पनीको लापरबाहीको फरक नाम मात्र देखिन्छ।

निर्माण कार्यमा ढिलाइ हुँदा प्रत्येक वर्ष विनियोजन गरिने बजेट फ्रिज हुने गरेको र स्थानीयवासीले निरन्तर सास्ती खेप्नुपरेको पूर्वाधार विकास कार्यालयले जनाएको छ। अब निर्माण कम्पनीलाई तत्काल दबाब नदिइने हो भने यी पुलहरू लामो समयसम्म अपूरै रहने र स्थानीयको पीडा झन् गहिरिँदै जाने निश्चित छ।