काठमाडौं- चालु आर्थिक वर्ष २०८२/८३ को चैत मसान्तसम्म नेपालका वाणिज्य बैंकहरूको कुल नाफा उल्लेखनीय रूपमा वृद्धि भएको छ। समग्रमा बैंकहरूले ४६ अर्ब ४४ करोड ९९ लाख रुपैयाँ नाफा आर्जन गरेका छन्, जुन अघिल्लो वर्षको सोही अवधिको ४० अर्ब ४ करोड रुपैयाँको तुलनामा करिब १५.९९ प्रतिशतले बढी हो।

बैंक तथा वित्तीय संस्थाहरुले सार्वजनिक गरेको तथ्यांकअनुसार अधिकांश बैंकहरूको नाफा बढ्दा केही बैंकहरू भने घट्दो अवस्थामा देखिएका छन्। नाफा वृद्धिमा कुमारी बैंक सबैभन्दा अगाडि देखिएको छ। बैंकको नाफा अघिल्लो वर्षको २८ करोड ५८ लाख रुपैयाँबाट बढेर ४ अर्ब १७ करोड ८० लाख रुपैयाँ पुगेको छ, जुन १३६१.८६ प्रतिशतको अत्यधिक वृद्धि हो।

त्यसैगरी, माछापुच्छ्रे बैंक (५०.४३%), हिमालयन बैंक (५२.४९%), सानिमा बैंक (४२.२२%), प्राइम बैंक (३८.५८%) र सिटिजन्स बैंक (३५.८२%) ले पनि उल्लेखनीय नाफा वृद्धि गरेका छन्।

ठूला बैंकहरूमध्ये नबिल बैंक ले ६ अर्ब ७६ करोड रुपैयाँ नाफा कमाउँदै ३३.९२ प्रतिशत वृद्धि हासिल गरेको छ भने लक्ष्मी सनराइज बैंक र नेपाल एसबिआइ बैंक को नाफा पनि क्रमशः २३.३६% र २१.४९% ले बढेको छ।

यद्यपि, सबै बैंकहरूको अवस्था सकारात्मक भने छैन। प्रभु बैंक को नाफा सबैभन्दा धेरै ५४.६१ प्रतिशतले घटेको छ। त्यस्तै नेपाल इन्भेष्टमेन्ट मेगा बैंक (-३०.६९%), कृषि विकास बैंक (-२४.४२%), एनआइसी एसिया बैंक (-१०.४७%) र स्टान्डर्ड चार्टर्ड बैंक (-४.२४%) को नाफा पनि घटेको देखिन्छ।

यस अवधिमा एभरेष्ट बैंक र ग्लोबल आइएमई बैंक को नाफामा सामान्य गिरावट देखिएको छ भने नेपाल बैंक को नाफा स्थिरजस्तै (०.३४% वृद्धि) रहेको छ।

समग्रमा बैंकिङ क्षेत्रले मिश्रित प्रदर्शन देखाए पनि कुल नाफामा दोहोरो अंकको वृद्धि हुनु अर्थतन्त्रमा केही सुधारको संकेत मानिएको छ।