काठमाडौं- आईसीसी क्रिकेट विश्वकप लिग–२ अन्तर्गत नेदरल्यान्ड्समा हुने त्रिदेशीय शृङ्खलाका लागि नेपाली राष्ट्रिय क्रिकेट टोलीलाई आइतबार बिदाइ गरिएको छ।

नेपाल क्रिकेट संघ (क्यान)ले आयोजना गरेको कार्यक्रममा सचिव पारस खड्काले टोलीले गत वर्ष स्कटल्यान्डमा जस्तै उत्कृष्ट प्रदर्शन दोहोर्‍याउने विश्वास व्यक्त गरे। कप्तान रोहित पौडेलले टोलीको तयारी राम्रो भएको र विश्वकप छनोटका लागि बाँकी लिग–२ शृङ्खला निकै महत्वपूर्ण रहेको बताए।

क्यान अध्यक्ष चतुरबहादुर चन्दले दबाबमुक्त भएर उत्कृष्ट प्रदर्शन गर्न टोलीलाई शुभकामना दिए।

नेपालले जुलाई २१ देखि सुरु हुने नेदरल्यान्ड्स, नामिबिया र नेपाल सम्मिलित लिग–२ शृङ्खलाअघि जर्सीमा तयारी क्याम्प गर्नेछ। त्यहाँ जुलाई १३ र १५ मा दुई अभ्यास एकदिवसीय खेल पनि खेल्ने क्यानले जनाएको छ।

यस शृङ्खलाका लागि टोलीको व्यवस्थापकमा श्रीधर केसी नियुक्त भएका छन् भने मुख्य प्रशिक्षक स्टुअर्ट ल केही समयपछि टोलीसँग जोडिने बताइएको छ।