मुगुमा सामुदायिक बिउ बैंक सञ्चालनमा

१ महिना अगाडि

काठमाडौँ-मुगुको छायानाथ रारा नगरपालिकामा रैथाने बालीको संरक्षण गर्न सामुदायिक बिउ बैंक सञ्चालन गरिएको छ । 

रारा सामुदायिक बिउ बैंकले रैथाने बालीको बिउ संरक्षण गर्दै आएको छ । संघसंस्थाहरूको सहयोग र सहकार्यमा नगरपालिकाले समुदायस्तरमै बिउ बैंक स्थापना गरी संरक्षणको व्यवस्था गरेको हो । वडा नं. ५ ढुममा ०७७ सालमा स्थापना भएको बिउ बैंकमा हाल नगरपालिकाका सबै वडाका बासिन्दा सदस्य छन् । बैंकमा धान, मार्सी, कागुनो, जौँ, फापर, कोदो, भटमास, उवा, चिनो, सिमी, मास, मुसुरो लगायत अन्य अन्नबाली, टिमुर, खुर्सानी, धुनियाँ, अदुवा, जिरा, लसुन, प्याज, बन्दा, गाँजर, मुला लगायत मसला र तरकारी बालीहरूको संरक्षण गरिएको अध्यक्ष कालीबहादुर रोकायाले बताए ।

‘गाउँ–गाउँमा विदेशी उत्पादनले पकड पायो । मान्छेहरूले पनि कुन रैथाने, कुन विदेशी छुट्याउन सक्ने अवस्था भएन,’ उनले भने, ‘किसानलाई आवश्यक पर्दा रैथाने बाली लगाउन र बिउ रोप्न सहज होस् भन्ने हेतुले हामीले रैथाने बाली संरक्षण गरेका छौँ ।’अहिले नगर क्षेत्रमा उत्पादित स्थानीय उत्पादनको बजारीकरणका लागि कोसेली घरको समेत स्थापना गरिएको छ । 

१ महिना अगाडि

प्रतिक्रिया