काठमाडौं - जापानी कार निर्माता कम्पनी होन्डा र निसानबीच मर्जर सम्झौता भएको छ। यी दुई कम्पनी गाभिएपछि बन्ने कम्पनी विश्वको तेस्रो ठुलो अटो निर्माता बन्नेछ । 

विश्वभर खनिज इन्धनबाट चल्ने सवारी साधनलाई विद्युतीय सवारी साधनले विस्थापित गर्ने नीति बढ्दै गइरहेको समयमा जापानको दोस्रो र तेस्रो ठुलो कार निर्माता गाभिन लागेका हुन् ।

सोमबार दुई कम्पनीले मर्जरसम्बन्धी सम्झौतामा हस्ताक्षर गरेका छन् । निशानको अलायन्स मेम्बर मिसुबिसीले पनि आफ्नो व्यवसायलाई मर्जरपछि बन्ने कम्पनीमा विलय गराउन सहमति जनाएको छ । 

नयाँ कम्पनीअन्तर्गत होन्डा र निशानले आफ्नो सञ्चालन एकीकरण गर्ने होन्डाका प्रसिडेन्ट तोशिहिरो माइबले भनेका छन् । नयाँ व्यवस्थापनको नेतृत्व सुरुमा होन्डाले गर्नेछ । कम्पनीले दुवै कम्पनीको सिद्धान्त र ब्रान्डलाई आत्मसाथ गर्ने बताइएको छ ।

औपचारिक मर्जर सम्झौता जुनसम्म सम्पन्न गर्ने र सम्झौतालाई सन् २०२६ को अगष्टमा पूरा गर्ने पनि माइबले बताए । सम्झौता कतिमा भयो भनेर बताइएको छैन । औपचारिक मर्जर वार्ता भर्खरै सुरु भएको पनि उनले बताए । विद्युतीय कारको क्षेत्रमा प्रतिस्पर्धीहरूको तुलनामा जापानी कम्पनीहरू निकै पछाडि छन् । 

पछिल्लो समय यिनीहरूले खर्च कटाउने प्रयास तीव्र पारेका छन् । होन्डा, निशान र मिसुबिसीको बजार पुँजीकरणका आधारमा नयाँ बन्ने कम्पनी ५० अर्ब डलरभन्दा ठुलो आकारको बन्नेछ ।-एजेन्सी