काठमाडौं— चीनको प्रमुख इन्टेलिजेन्ट र न्यू इनर्जी भेहिकल निर्माता कम्पनी सेरेस ग्रुपले सन् २०२५ को पहिलो त्रैमासिकमा २४१ प्रतिशत नाफा वृद्धि गर्दै १०० मिलियन अमेरिकी डलरभन्दा बढी मुनाफा कमाएको छ। कम्पनीले सार्वजनिक गरेको आय विवरण अनुसार सेयर मूल्यमा ३ प्रतिशतले वृद्धि भएको छ । 

सेरेसको त्रैमासिक बिक्री राजस्व पनि ३ अर्ब अमेरिकी डलर नाघेको छ, जसको मुख्य कारण ऊर्जा-कुशल र नवप्रवर्तनयुक्त सवारी साधनहरूमा वृद्धि भएको माग हो। कम्पनीले नवप्रवर्तन, दिगोपन, र ग्राहकमुखी डिजाइनमा आफ्नो प्रतिबद्धता जारी राख्दै स्मार्ट मोबिलिटी समाधानहरू विश्वव्यापी वातावरणीय लक्ष्यहरूसँग मेल खाने गरी अघि बढाइरहेको जनाएको छ।

चीनको लक्जरी सवारी सेग्मेन्टमा समेत सेरेसले बीएमडब्लू र मर्सिडिज जस्ता ब्रान्डहरूलाई पछाडि पार्दै अग्रता लिएको छ। कम्पनीले आगामी दिनहरूमा अझ बढी रेन्ज, पर्फर्मेन्स र स्मार्ट फिचर भएका नयाँ विद्युतीय गाडीहरू सार्वजनिक गर्ने योजना बनाएको छ, जसले चीनको कार्बन न्युट्रालिटी लक्ष्यमा सहयोग पुर्‍याउने अपेक्षा गरिएको छ।

विश्वव्यापी विस्तार रणनीतिअन्तर्गत सेरेसले सन् २०२६ भित्र नेपालमा तीनवटा नयाँ विद्युतीय सवारी मोडेल ल्याउने घोषणा गरेको छ। यसले चीनबाहिर पनि विद्युतीय सवारी साधनहरूको रूपान्तरणमा सेरेसको अग्रणी भूमिका पुष्टि गरेको छ।

त्यसैगरी, सेरेस थ्री मोडेलले हालै इन्डोनेसियामा तीन प्रतिष्ठित अवार्डहरू जितेर न्यू इनर्जी भेहिकल बजारमा आफ्नो उत्कृष्टता र नवप्रवर्तन क्षमतालाई पुनः प्रमाणित गरेको छ।

अग्रगामी रणनीति र नवप्रवर्तन क्षमताका कारण सेरेस ग्रुपले चीन तथा विश्वव्यापी ईभी उद्योगमा आफ्नो प्रमुख भूमिका अझ बलियो बनाउँदै लगिरहेको देखिन्छ।