काठमाडौं- विश्वव्यापी मोबिलिटी र सहरी सेवा प्लेटफर्म इनड्राइभले नेपालमा ‘राइड टु सपोर्ट’ अभियान सुरु गरेको छ । 

यो अभियान स्थानीय समुदायलाई प्रत्यक्ष रूपमा लाभ पुर्‍याउने उद्देश्यले प्राथमिक विद्यालयहरूमा खेलकुद संरचना र सुविधा सुधारमा केन्द्रित रहेको कम्पनीले जनाएको छ । 

समुदाय–सञ्चालित यो पहल अन्तर्गत, इनड्राइभले मे महिनाभरि नेपालभर सञ्चालित प्रत्येक तेस्रो राइडबाट संकलित भाडाको १० प्रतिशत रकम स्थानीय प्राथमिक विद्यालयहरूमा खेल मैदानको मर्मत र खेलकुद सामग्री वितरणमा खर्च गर्नेछ । 

बास्केटबल, ब्याडमिन्टन, र फुटसलजस्ता खेलहरूका लागि आवश्यक किटहरू प्रदान गरिने इनड्राइभको यो अभियानले स्थानीय स्तरमा सकारात्मक परिवर्तन ल्याउन र बालबालिकाहरूको समग्र विकासमा योगदान पुर्‍याउने उद्देश्य राखेको छ ।

यो अभियान समुदायमा समावेशी विकास र सशक्तीकरणको भावना फैलाउन केन्द्रित छ । 

इनड्राइभकी एपीएसी कम्युनिकेसन लिड पावित नन्द आनन्दले भनिन्, ‘हामी दृढतापूर्वक विश्वास गर्छौँ कि राइड टु सपोर्ट जस्ता उद्देश्य–केन्द्रित पहलहरूले समुदायलाई सकारात्मक रूपमा परिचालन गर्न सहयोग पुर्‍याउँछ । यस्ता पहलहरू मार्फत हामी हाम्रो सामाजिक प्रभावलाई अझ सशक्त बनाउँदै लैजान सक्छौँ। यसले अरूलाई पनि सामाजिक न्याय र समानताको यात्रामा सहभागी हुन उत्प्रेरित गर्छ । हरेक राइड केवल गन्तव्यसम्मको यात्रा मात्र होइन, यो एक सामाजिक परिवर्तनतर्फको सार्थक पाइला हो। मे महिनामा गरिएको प्रत्येक राइडले विद्यार्थीहरूका लागि सुरक्षित, रमाइलो र आवश्यक संरचनासहितको स्थान निर्माणमा सहयोग पुर्‍याउनेछ, जहाँ उनीहरूले खेल्न, सिक्न र आत्मविश्वासका साथ बढ्न सकुन् ।’

अभियानमार्फत इनड्राइभले सामाजिक उत्तरदायित्वलाई व्यवहारमा उतार्दै, बालबालिका र युवापुस्तालाई उज्ज्वल भविष्यतर्फ उत्सुक गराउने प्रयास गरिरहेको छ । अभियानले राइडिङ यात्रालाई मात्र नभई समावेशी विकासको दिशामा अगाडि बढ्ने यात्रा बनाएको कम्पनीले जनाएको छ ।