काठमाडौं– चीनको नम्बर १ व्यावसायिक सवारीसाधन ब्रान्ड फोटोनले नेपालका लागि विशेष रूपमा डिजाइन गरिएको नयाँ पिकअप गाडी फोटोन टुनल्यान्ड जी ७ सार्वजनिक गर्ने भएको छ । अत्याधुनिक प्रविधि, शक्तिशाली इन्जिन र आरामदायी सुविधासहित यो गाडी नेपाली भूगोलका चुनौतीपूर्ण सडकहरूमा उत्कृष्ट प्रदर्शन गर्न सक्षम हुने दाबी गरिएको छ।

टुनल्यान्ड जी ७ मा १६० हर्सपावर र ३९० एनएम टर्क क्षमताको इन्जिन छ, जुन उच्च उकालो–ओरालो र दुर्गम हिमाली मार्गमा सजिलै सञ्चालन गर्न सकिने बनाइएको छ। यसमा २२५ मिमी ग्राउन्ड क्लियरेन्स, हिल होल्ड र हिल डिसेन्ट कन्ट्रोल, र पुस-स्टार्ट बटनजस्ता अत्याधुनिक सुरक्षात्मक र सहायक प्रविधिहरू पनि समावेश छन्।

गाडीको क्याबिनमा १२.३ इन्चको इन्फिनिटी स्क्रिन, १२–तरिका एड्जस्ट गर्न मिल्ने हीटेड तथा भेन्टिलेटेड सिट, प्यानोरामिक सनरूफ, र स्वचालित एयर कन्डिसनिङ सिस्टम जस्ता आरामदायी फिचरहरू छन्। यी सबै सुविधाले टुनल्यान्ड जी ७ लाई आराम, शक्ति र नवीनतासँगै पारिवारिक र व्यवसायिक प्रयोग दुवैका लागि उपयुक्त बनाएको कम्पनीको भनाइ छ।

फोटोनले टुनल्यान्ड जी ७ लाई नेपाली ग्राहकका आवश्यकताअनुसार डिजाइन गरिएको गाडीको रूपमा प्रस्तुत गरेको हो। पहाडतिर यात्राका सौखिन, व्यवसायिक प्रयोगकर्ताहरू वा विकेन्ड एड्भेन्चर मन पराउनेहरूका लागि पनि यो एक भरपर्दो साथी हुने कम्पनीको विश्वास छ।