काठमाडौं– राष्ट्रिय सूचना आयोगले विपत्तिमा परेका सार्वजनिक निकायलाई कागजात अद्यावधिक गर्न आह्वान गरेको छ । 

आयोगले आज  एक प्रेस विज्ञप्ति जारी गर्दै सबै सार्वजनिक निकायलाई आफ्ना सबै सूचना पुनःप्राप्त गरी अद्यावधिक गर्ने, नष्ट भएका र सुरक्षित रहेका कागजातको विवरण तयार गरी अभिलेख राख्न आग्रह गर्दै त्यसको जानकारी राष्ट्रिय सूचना आयोगमा पठाउन आह्वान गरेको हो ।

‘आगजनी तोडफोडको विपत्ति भोगेका राजनीतिक दल, निजी क्षेत्र र राज्यका सबै सार्वजनिक निकायलाई आफ्ना सबै सूचना पुनःप्राप्त गरी अद्यावधिक गर्ने, नष्ट भएका र सुरक्षित रहेका कागजातको अलग अलग विवरण तयार गरी अभिलेख राख्न र सो विवरणको जानकारी राष्ट्रिय सूचना आयोगमा पठाउन सम्बन्धिन सबै सार्वजनिक निकायलाई राष्ट्रिय सूचना आयोगले आह्वान गरेको छ ।’, आयोगको विज्ञप्तिमा भनिएको छ । 

साथै जेन जी आन्दोलनका क्रममा सार्वजनिक निकायका भवनमा भएको आगजनी तथा तोडफोडको अवस्थाप्रति आयोगले गम्भीर ध्यानाकर्षण भएको जनाएको छ ।