काठमाडौं- निर्जीवन बीमा कम्पनी युनाइटेड अजोड इन्स्योरेन्सको हकप्रद सेयर सुरक्षित गर्ने आज अन्तिम दिन रहेको छ।

कम्पनीले हकप्रद सेयर निष्कासन गर्न फागुन १७ गते बुक क्लोज गर्ने निर्णय गरेको छ। यसको अर्थ आज फागुन १४ गते (फागुन १५ गते शुक्रबार र फागुन १६ गते शनिबार) सम्म कायम सेयरधनीहरुले यो कम्पनीको हकप्रद सेयरमा आवेदन दिन पाउनेछन्।

नेपाल धितोपत्र बोर्डबाट माघ २७ गते युनाइटेड अजोड इन्स्योरेन्सले हकप्रद सेयर जारी गर्ने अनुमति पाएको थियो। धितोपत्र बोर्डले यो कम्पनीलाई हाल कायम चुक्तापुँजीको १००ः१० अनुपातमा अर्थात १० प्रतिशत हकप्रद सेयर जारी गर्ने अनुमति दिएको छ।

अब कम्पनीले आफ्ना सेयरधनीहरुलाई २३ करोड १० लाख रुपैयाँबराबरको १०० रुपैयाँ अंकित दरका कुल २३ लाख १० हजार कित्ता हकप्रद सेयर जारी गर्नेछ। 

कम्पनीको हकप्रद सेयर बिक्री प्रबन्धकमा लक्ष्मी सनराइज क्यापिटल रहेको छ।

हाल कम्पनीको चुक्तापुँजी २ अर्ब ३१ करोड रुपैयाँ रहेको छ। हकप्रद बिक्रीपछि कम्पनीको चुक्तापुँजी २ अर्ब ५४ करोड १० लाख रुपैयाँ पुग्नेछ।