काठमाडौं- नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठले अर्थतन्त्रमा अपेक्षित सुधार आउन नसक्नुको मुख्य कारण दीर्घकालीन सोचको अभाव र राजनीतिक अस्थिरता भएको बताएका छन्।

महासंघको ६०औँ वार्षिक साधारणसभामा बोल्दै उनले पछिल्ला वर्षहरूमा सरकार र गठबन्धनको बारम्बार परिवर्तनले नीतिगत निरन्तरता कमजोर बनेको उल्लेख गरे। “सरकार फेरिँदा नीति र प्राथमिकता पनि फेरिन्छन्, जसले राम्रा कार्यक्रमसमेत प्रभावकारी रूपमा कार्यान्वयन हुन पाउँदैनन्,” उनले भने।

श्रेष्ठले अहिलेको अवस्थालाई अवसरका रूपमा लिनुपर्ने बताउँदै स्थिर सरकारबाट नीतिगत स्थायित्व आउने विश्वास व्यक्त गरे। निजी क्षेत्रले अर्थतन्त्रको ठूलो हिस्सा धानेको उल्लेख गर्दै उनले सरकारसँग सहकार्यको वातावरण आवश्यक रहेको बताए।

उनले आगामी तीन वर्षका लागि पाँच प्राथमिकता सार्वजनिक गर्दै निजी क्षेत्र र सरकारबीचको सम्बन्ध पुनःपरिभाषित गर्ने प्रतिबद्धता व्यक्त गरे। नीति निर्माण, बजेट, कानुन र अन्तर्राष्ट्रिय वार्तामा निजी क्षेत्रको सहभागिता सुनिश्चित गरिने उनको भनाइ छ।

निजी क्षेत्रप्रतिको नकारात्मक धारणा परिवर्तन गर्न अभियान सञ्चालन गरिने, लगानी सुरक्षा सुनिश्चित गरिने र व्यावसायिक विवाद समाधान प्रणाली सुधार गरिने उनले बताए। साथै, स्वदेशी तथा विदेशी लगानी प्रवद्र्धनका लागि सरकारसँग नियमित संवाद गरिने उनको प्रतिबद्धता छ।

श्रेष्ठले महासंघलाई स्थानीय तहसम्म प्रभावकारी बनाउने योजना सार्वजनिक गर्दै आर्थिक सुधार, सुशासन, प्रतिस्पर्धात्मकता, श्रम–सीप विकास र संस्थागत सुदृढीकरणमा केन्द्रित कार्ययोजना अघि सारिएको जानकारी दिए।

उनले सरकार र निजी क्षेत्रबीच सहकार्य अपरिहार्य रहेको उल्लेख गर्दै आर्थिक रूपान्तरण संयुक्त प्रयासबाट मात्र सम्भव हुने धारणा व्यक्त गरे।