काठमाडौं– राष्ट्रपति रामचन्द्र पौडेलले सामाजिक सद्भाव, एकता, मेलमिलाप र समावेशी लोकतन्त्रको प्रवद्र्धनमा सामुदायिक रेडियोले खेलेको भूमिका नेपालमा मात्र होइन, विश्वस्तरमै अध्ययन र अनुकरणको विषय बनेको धारणा व्यक्त गरेका छन्। 

राष्ट्रपति पौडेलले एसिया प्रशान्त प्रसारण विकास संस्था एवम् सामुदायिक रेडियो प्रसारक संघका पदाधिकारीहरूसँग बुधबार शीतल निवासमा भएको भेटघाटमा सो धारणा व्यक्त गर्नुभएको हो । “नेपालको दूरदराजसम्म सामुदायिक रेडियोले समुदायको भाषा र संस्कृति संरक्षण एवम् नागरिकलाई सुसूचित गराउन खेलेको भूमिकाको म प्रशंसा गर्न चाहन्छु”, उनले भने । 

नेपालको प्रसारण क्षेत्रको कुरा गर्दा सामुदायिक रेडियोको योगदानलाई विशेष रूपमा उल्लेख गर्न चाहन्छु भन्दै उनले स्थापनाकालदेखि नै नेपालका सामुदायिक रेडियोहरूले राजनीतिक, सामाजिक तथा सांस्कृतिक परिवर्तनका विभिन्न चरणमा महत्वपूर्ण भूमिका निर्वाह गर्दै आएको बताए । “ यसले नेपालको बहुभाषिक, बहुसांस्कृतिक र विविधतापूर्ण समाजको प्रतिनिधित्व गर्नुका साथै लोपोन्मुख भाषा तथा संस्कृतिको संरक्षण र प्रवद्र्धनमासमेत महत्वपूर्ण योगदान पु¥याएको छ”, राष्ट्रपति पौडेलले भने। 

रेडियो अब रेडियो सेटमा मात्र सीमित छैन र टेलिभिजन अब टेलिभिजनको पर्दामा मात्र सीमित नभएको उनको भनाइ थियो । “आज समाचार मोबाइल फोनमा छ, पोडकास्टमा छ, सामाजिक सञ्जालमा छ, डिजिटल प्लेटफर्ममा छ र कृत्रिम बौद्धिकताले तयार पार्ने तथा वितरण गर्ने नयाँ माध्यमहरूमासमेत पुगिरहेको छ”, उनले भने। 

एसिया प्रशान्त प्रसारण विकास संस्थाको २४ औं साधारण सभा तथा एसिया प्रशान्त क्षेत्रीय मिडिया कार्यशाला काठमाडौंमा आयोजना भएको र यसले बाल पोषणमा सञ्चारको भूमिका, संसदीय अभ्यास, डिजिटल शुसासन र प्रसारणमा एआई तथा नयाँ प्रविधिको रुपान्तरणको विषयमा छलफल गरेर एसियाका प्रशारकहरूको अबको मार्गदर्शन तयार पारेको थाहा पाउँदा खुसी लागेको उनले उल्लेख गरे ।