काठमाडौँ - टर्कीमा इन्ष्टाग्राम चल्न थालेको छ ।

त्यहाँको सरकारले देखाएका चासो र चिन्ताहरूलाई कम्पनीले सम्बोधन गर्छु भनेपछि टर्की सरकारले नौ दिनपछि उक्त सामाजिक सञ्जालमा लगाएको प्रतिबन्ध हटाएको हो ।
आफ्नो कानुन र नियम अनि सार्वजनिक संवेदनशीलताको अनुपालना गर्न नसकेको भन्दै अगस्ट २ मा सरकारले इन्ष्टाग्राममाथि प्रतिबन्ध लगाएको थियो । 

प्यालेष्टिनी सशस्त्र समूह हमासका नेता इस्लामी हानियाको हत्यासम्बन्धी एउटा पोस्टमा आफ्नो समवेदना राख्न नदिएको आरोप शीर्ष टर्किस अधिकारीले इन्ष्टाग्राममाथि लगाएका थिए । गाजामा इजरायलको आक्रमणको निन्दा गर्दै टर्कीले तत्कालै युद्ध विराम गर्न माग गरेको थियो । 

नौ दिनसम्म इन्ष्टाग्राम नचलेपछि टर्कीस प्रयोगकर्ता र साना व्यवसायीले विरोध गरेका थिए । इन्ष्टग्राम प्रयोगमा भारत, अमेरिका, ब्राजिल र इन्डोनेसियापछि टर्की विश्वको पाँचौँ स्थानमा छ । त्यहाँ ५ करोड ७० लाख भन्दा धेरैले इन्ष्टाग्राम चलाउँछन् ।एजेन्सी