काठमाडौं - कम्प्युटर एशोसिएसन नेपाल महासङ्घ (क्यान) जिल्ला शाखा नुवाकोटको तेस्रो अधिवेशनले सर्वसम्मत रूपमा अध्यक्ष नारायणकुमार घलेलाई  निर्वाचित गरेको छ। 

घलेको नेतृत्वमा सात सदस्यीय कार्यसमिति गठन भएको छ । जसले स्थानीय स्तरमा सूचना तथा सञ्चार प्रविधि (आइसिटी) को विकास, डिजिटल साक्षरता प्रवर्द्धन, र युवा केन्द्रित कार्यक्रमहरू सञ्चालन गर्ने लक्ष्य राखेको छ।

अधिवेशनले उपाध्यक्षमा तारा रिमाल नेपाल, सचिवमा सुनिल श्रेष्ठ, कोषाध्यक्षमा अजय नगरकोटी,सहसचिवमा विशाल सापकोटा र सदस्यहरूमा क्रमशः रामकृष्ण देवकोटा, हेमन्तराज घिमिरे रहेका छन् । 

क्यान नुवाकोटको वार्षिक साधारण सभा तथा तेस्रो अधिवेशन क्यान महासङ्घका केन्द्रीय महासचिव चिरञ्जीवी अधिकारीको प्रमुख आतिथ्ययतामा सम्पन्न भयो। कार्यक्रममा अधिकारीले नारायणकुमार घलेलाई एक गतिशील नेतृत्वकर्ता भन्दै, स्थानीय स्तरमा आइसिटी विकास, डिजिटल साक्षरता, र युवा केन्द्रित गतिविधिमा ध्यान केन्द्रित गर्न सुझाव दिए। 

चिरञ्जीवी अधिकारी नेपाल चेम्बर अफ कमर्सका साइबर सुरक्षा सल्लाहकार, नेपाल विज्ञान तथा प्रविधि प्रतिष्ठानका आइसिटी विशेषज्ञ सदस्य, र नेपाल कपी राइट कार्यालयका आइसिटी विशेषज्ञ पनि हुन्।

पद हस्तान्तरण कार्यक्रमका क्रममा क्यान महासङ्घका केन्द्रीय महासचिव चिरञ्जीवी अधिकारी, सचिव शेखरनाथ दुलाल, र निवर्तमान अध्यक्ष पवन नेपालले नवनिर्वाचित पदाधिकारीहरूलाई टिका, खादा, र प्रमाणपत्र प्रदान गरे।कम्प्युटर एशोसिएसन नेपाल ९क्यान० महासङ्घ सन् १९९२ मा सूचना तथा सञ्चार प्रविधि क्षेत्रको संस्थागत विकासका लागि गैर नाफामूलक संस्थाको रूपमा स्थापना भएको हो। 

आइसिटी क्षेत्रमा संलग्न विज्ञ, जनशक्ति, र व्यवसायीहरूको छाता संगठनको रूपमा क्यानले डिजिटल परिवर्तन र प्रविधि प्रवर्द्धनमा महत्त्वपूर्ण भूमिका खेलिरहेको छ। नयाँ कार्यसमितिले नुवाकोट जिल्लामा डिजिटल परिवर्तनलाई तीव्रता दिनका लागि विभिन्न नवीन कार्यक्रम र परियोजनाहरू अघि बढाउने अपेक्षा गरिएको छ।