काठमाडाैं- झापा जिल्लामा दुई छुट्टाछुट्टै घटनामा एक जनाको कुटपिटबाट मृत्यु भएको छ भने कुकुरको टोकाइका कारण एक सात वर्षीय बालकको ज्यान गएको छ।

कमल गाउँपालिका–७ का ४५ वर्षीय देवलाल चौधरीको लाठी प्रहारबाट मृत्यु भएको इलाका प्रहरी कार्यालय दमकले जनाएको छ। सामान्य विवादका क्रममा सोही स्थानका ३७ वर्षीय पुण्यप्रसाद बाँस्तोलाले दुई दिनअघि चौधरीलाई लाठीले कुटपिट गरेका थिए। गम्भीर घाइते भएका चौधरीको उपचारका क्रममा शनिबार दमकको लाइफ लाइन अस्पतालमा मृत्यु भयो। घटनालगत्तै प्रहरीले बाँस्तोलालाई नियन्त्रणमा लिएको छ।

यस्तै, झापाको कन्काई नगरपालिकामा कुकुरको टोकाइका कारण एक सात वर्षीय बालकको ज्यान गएको छ। सङ्खुवासभाको चैनपुर नगरपालिका–७ घर भई हाल कन्काई नगरपालिका–२ सुकेडाँगीमा बस्दै आएका कुमार रम्तेलका छोरा प्रकाश रम्तेलको दुखद निधन भएको हो।

डेढ महिना अघि कुकुरले टोकेपछि कुनै गम्भीर समस्या नदेखिएको कारण बालकको उपचार नगरिएको थियो। तर, शुक्रबार अचानक स्वास्थ्य अवस्था गम्भीर भएपछि उनलाई भद्रपुरस्थित प्रादेशिक अस्पतालमा लगियो। त्यहाँ प्रारम्भिक उपचारपछि काठमाडौँ लैजाने तयारी भइरहेको बेला अवस्था बिग्रँदै गएपछि हेटौँडास्थित सीएमसी चुरी हिल अस्पताल पुर्‍याइयो। दुर्भाग्यवश, शनिबार बिहान उपचारकै क्रममा उनको मृत्यु भएको जिल्ला प्रहरी कार्यालय झापाले जनाएको छ।

यी दुई घटनाले स्थानीयबासीलाई स्तब्ध बनाएको छ। सुरक्षाका लागि सचेत रहनुका साथै पशुपालन र विवाद समाधानका क्रममा संयमता अपनाउनुपर्ने आवश्यकता देखिएको छ।