काठमाडौं- कर्णालीको पहाडी भूभाग पुनः भूकम्पको धक्काले हल्लिएको छ। मंगलबार साँझ ५ः२० बजे दैलेखको तोलीजैसी आसपास केन्द्रबिन्दु बनाएर ४.४ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ।

भूकम्पको प्रभाव दैलेखसँगै अछाम, सुर्खेत, कालीकोटलगायत आसपासका जिल्लाहरूमा समेत महसुस गरिएको छ। स्थानीयहरू अचानक आएको कम्पनले केही क्षण त्रसित बनेका थिए।

यसअघि, माघ ११ गते गण्डकी प्रदेशको पर्वत केन्द्रबिन्दु भएर भूकम्प गएको थियो। पछिल्ला दिनहरूमा नेपालका विभिन्न भागमा भूकम्पको गतिविधि बढिरहेको देखिन्छ, जसले भूगर्भीय चपेटामा रहेको नेपालको भौगोलिक संवेदनशीलतालाई पुनः स्मरण गराएको छ।

प्राकृतिक विपत्तिबाट सुरक्षित रहन विज्ञहरू पूर्वसावधानी अपनाउन तथा सुरक्षित संरचनाको प्रवर्द्धन गर्न आग्रह गर्छन्।