काठमाडाैं- सीईडीबी होल्डिङ्सले चालु आर्थिक वर्षको दोस्रो त्रैमास (साउन–पुस)सम्मको अपरिष्कृत वित्तीय विवरण सार्वजनिक गरेको छ, जसअनुसार कम्पनीले ऐतिहासिक नाफा आर्जन गर्न सफल भएको छ।

वित्तीय विवरणअनुसार कम्पनीले चालु आर्थिक वर्षको दोस्रो त्रैमाससम्म २० करोड ९४ लाख रुपैयाँ नाफा आर्जन गरेको छ। यो अघिल्लो वर्षको सोही अवधिको तुलनामा उल्लेख्य वृद्धि हो। गत वर्ष सोही अवधिमा कम्पनीको नाफा मात्र ५ करोड ३६ लाख रुपैयाँ थियो। कम्पनीको आम्दानीमा समेत विस्फोटक वृद्धिदर देखिएको छ, जसले २९०.५८ प्रतिशतको छलाङ मारेको छ।

पुस मसान्तसम्म कम्पनीले सेवाशुल्क, ब्याज तथा अन्य माध्यमबाट कुल २३ करोड १ लाख रुपैयाँ आम्दानी गरेको छ। अघिल्लो वर्ष यही अवधिमा यो आँकडा ७ करोड ९ लाख रुपैयाँ मात्र थियो। यसरी कम्पनीको कुल आम्दानीमा २२४.३३ प्रतिशतको चमत्कारी वृद्धि देखिएको छ।

कम्पनीको शेयर पुँजी १ अर्ब ३ करोड ४२ लाख रुपैयाँ पुगेको छ भने जगेडा कोष र सञ्चित नाफा ६० करोड ४ लाख रुपैयाँ पुगेको छ। अघिल्लो वर्ष यो रकम ५५ करोड ८ लाख रुपैयाँ थियो, जसले ९ प्रतिशतको वृद्धि दर्शाउँछ।

कम्पनीको वार्षिकीकृत प्रतिशेयर आम्दानी (ईपीएस) ४०.५१ रुपैयाँ रहेको छ, जसले लगानीकर्ताहरूको लागि सकारात्मक संकेत दिएको छ। साथै, मूल्य आम्दानी अनुपात (पीई रेसियो) ४०.२१ गुणा रहेको छ। कम्पनीको प्रतिशेयर नेटवर्थ १५८.०६ रुपैयाँ पुगेको छ, जसले यसको वित्तीय मजबुतीको परिचय दिन्छ।

सीईडीबी होल्डिङ्सको यस ऐतिहासिक वित्तीय वृद्धिले कम्पनीको भविष्य थप उज्यालो देखाएको छ। लगानीकर्ताहरूले पनि यो वृद्धिलाई सकारात्मक रूपमा लिएको देखिन्छ।