काठमाडाैं- हाल देशभर पश्चिमी वायुको आंशिक प्रभाव रहेको छ। जल तथा मौसम पूर्वानुमान महाशाखाका अनुसार कोशी र गण्डकी प्रदेशका पहाडी भू–भागमा आंशिक बदली रहँदा अन्य स्थानमा मौसम सामान्यतया सफा रहेको छ। मध्य र पूर्वी तराईका केही स्थानमा हुस्सु लागेको छ, जसले दैनिक जनजीवनमा आंशिक प्रभाव पार्ने सम्भावना छ।

आज दिउँसो कोशी र गण्डकी प्रदेशका पहाडी क्षेत्रमा आंशिक बदली रहनेछ भने अन्य स्थानमा मौसम खुल्ने अनुमान गरिएको छ। साथै, कोशी प्रदेशका उच्च पहाडी तथा हिमाली क्षेत्रमा एक-दुई स्थानमा हल्का हिमपातको सम्भावना छ, जसले स्थानीय जनजीवन तथा यात्रा व्यवस्थापनमा असर पार्न सक्छ।

आज राति पनि कोशी र गण्डकी प्रदेशका पहाडी भूभागमा आंशिक बदली रहनेछ भने अन्यत्र मौसम सफा रहनेछ। आगामी २४ घण्टामा कोशी प्रदेशका उच्च पहाडी तथा हिमाली क्षेत्रमा पुनः हल्का हिमपातको सम्भावना रहेको छ।

शनिबार बिहान तराईका केही स्थानमा हुस्सु लाग्न सक्ने भएकाले महाशाखाले सवारी साधनका चालक, हवाई यात्रु तथा स्वास्थ्यप्रति संवेदनशील व्यक्तिहरूलाई विशेष सतर्कता अपनाउन आग्रह गरेको छ। मौसम परिवर्तनसँगै चिसो बढ्ने भएकाले आवश्यक सतर्कता अपनाउन महाशाखाले अनुरोध गरेको छ।