काठमाडौं- अब नेपालमा हेमोफिलिया रोगका बिरामीलाई निःशुल्क औषधि उपलब्ध गराइने भएको छ । स्वास्थ्य तथा जनसङ्ख्या मन्त्रालय र विश्व हेमोफिलिया महासङ्घबीच सम्झौता भएसँगै यो पहल अघि बढाइएको हो ।

स्वास्थ्य तथा जनसङ्ख्या मन्त्रालयको निजी सचिवालयका अनुसार गत शुक्रबार औषधि व्यवस्था विभागमा उक्त सम्झौतामा हस्ताक्षर गरिएको हो । सम्झौताअनुसार महासङ्घबाट प्राप्त औषधि अब नेपालभरका सङ्घीय, प्रादेशिक तथा अन्य सरकारी अस्पतालमार्फत बिरामीहरूलाई वितरण गरिनेछ ।

हेमोफिलिया, जुन वंशाणुगत रूपमा सर्ने एक दुर्लभ रक्तस्रावसम्बन्धी रोग हो, यसका बिरामीहरूलाई समयमा उचित उपचार उपलब्ध नहुँदा गम्भीर जटिलता उत्पन्न हुन सक्छ । तर, अब महासङ्घको सहकार्यमा नेपालमा हेमोफिलिया बिरामीहरूले जीवनरक्षक औषधि सहज रूपमा प्राप्त गर्नेछन् ।

स्वास्थ्य तथा जनसङ्ख्या मन्त्रालयका प्रवक्ता डा. प्रकाश बुढाथोकीका अनुसार हाल मुलुकभर ९०० जना हेमोफिलिया रोगी पहिचान भएका छन् । विश्व स्वास्थ्य सङ्गठनको अनुमानअनुसार नेपालमा करिब पाँच हजार हेमोफिलिया बिरामी अझै पहिचान हुन बाँकी छ । सन् २०२१ को जनगणनामा २.२ प्रतिशत नागरिक अपाङ्गता भएका देखिए, जसमा ०.८ प्रतिशत व्यक्तिहरू हेमोफिलियाका बिरामी हुनसक्ने अनुमान गरिएको छ ।

नेपालमा हेमोफिलिया रोगीहरूको उपचारमा निःशुल्क औषधि वितरणको यो निर्णय एक ऐतिहासिक उपलब्धि मानिएको छ । सरकारले महासङ्घसँगको सहकार्यलाई थप मजबुत बनाउँदै बिरामीहरूको जीवनस्तर सुधार गर्न प्रतिबद्धता जनाएको छ ।

यो पहलले हेमोफिलिया पीडितहरूमा आशाको किरण जगाउने विश्वास गरिएको छ ।