काठमाडाैं- नेपालको मोटरस्पोर्ट क्षेत्रमा नयाँ तरंग ल्याउने प्रतिबद्धतासहित, नेपाली युवा दिपेश श्रेष्ठले भारतको प्रतिष्ठित रोयल इनफिल्ड स्लाइड स्कूल रेसिङ ट्रेनिङ कार्यक्रम सफलतापूर्वक सम्पन्न गरेका छन्। हाल अल्फा अटोमोटिभका कार्ट हेडका रूपमा कार्यरत श्रेष्ठले आफ्नो सीपलाई नयाँ उचाइमा पुर्‍याउँदै, अफ-रोड रेसिङमा नेपालको उज्ज्वल भविष्य निर्माण गर्ने लक्ष्य राखेका छन्।

जनवरी २५–२६ मा आयोजित दुई दिने यो विशेष प्रशिक्षण कार्यक्रममा दिपेशले बाइक नियन्त्रण, क्र्यास म्यानेजमेन्ट, अफ-रोड रेसिङका उन्नत प्रविधिहरू तथा चुनौतीपूर्ण ट्र्याकमा कसरी उत्कृष्ट प्रदर्शन गर्ने भन्ने जस्ता महत्वपूर्ण सीपहरू प्राप्त गरे।

उक्त प्रशिक्षणमा रोयल इनफिल्ड हिमालयन ४११ बाइकको प्रयोग गर्दै, उनले माटोयुक्त तथा फ्याल्ट ट्र्याकहरूमा प्रभावकारी राइडिङ प्रविधिहरू आत्मसात गरे। बाइकको सही पोस्चर, सुरक्षात्मक राइडिङ गियरको महत्त्व, रेसिङ फ्ल्याग संकेतहरूको प्रयोग जस्ता व्यावहारिक पक्षहरूमा विशेष ध्यान दिइएको थियो।

नेपालमा अफ-रोड रेसिङ खेलप्रति बढ्दो रुचि रहेको सन्दर्भमा, दिपेशजस्ता युवाको उत्साहले यो क्षेत्रलाई अझ व्यवस्थित र व्यावसायिक बनाउने विश्वास गरिएको छ। अन्तर्राष्ट्रिय स्तरमा नेपालको नाम चम्काउने उद्देश्यसहित, उनले सिकेका सीपहरू नेपालमा लागू गर्दै, नयाँ पुस्तालाई मोटरस्पोर्टको रोमाञ्चक संसारतर्फ आकर्षित गर्न महत्वपूर्ण भूमिका खेल्नेछन्।

नेपालको मोटरस्पोर्टमा नयाँ युगको सुरुवात गर्दै, दिपेश श्रेष्ठको यो यात्रा सारा बाइकप्रेमी तथा अफ-रोड एडभेन्चरप्रेमीहरूका लागि प्रेरणादायी बन्नेछ!