काठमाडौं–विश्व बैंकले २०२५ र २०३१ को बीचमा देश साझेदारी ढाँचाअन्तर्गत नेपाललाई लगभग ४२.७ अर्ब उपलब्ध गराउने लक्ष्य राखेको छ । दक्षिण एसियाका लागि विश्व बैंकका उपाध्यक्ष जोहान्स जुटले नेपालको पहिलो पाँच दिने औपचारिक भ्रमण पूरा गरेर फर्किने क्रममा उक्त विषय राखेका हुन् ।

उपाध्यक्ष जुटले शान्ति सुदृढीकरण, सेवा सुधार, लोडसेडिङ अन्त्य, र २०१५ को भूकम्प र कोभिड महामारीबाट मुक्ति पाएको नेपालको प्रगति प्रशंसनीय रहेको बताए । जुटले विश्व बैंक समूहको नेपालका लागि नयाँ देश साझेदारी ढाँचाबारे सरकारको १६औं योजनासँग सम्बन्धित विषयबारे चर्चा गरेका हुन् । उनले नेपालका दुई सबैभन्दा महत्त्वपूर्ण विकास चुनौती रोजगारी सिर्जना र विपद् उत्थानशीलतामा केन्द्रित हुनुपर्ने औंल्याएका छन् ।

यसको प्रमुख उद्देश्य पर्यटन र डिजिटल विकाससहित प्रतिस्पर्धात्मक एवं लगानी बढाउन व्यावसायिक वातावरण सुधारेर रोजगारी सिर्जना रहेको बैंकको विज्ञप्तिमा उल्लेख छ । पाँचदिने भ्रमणका क्रममा उनले उपप्रधान तथा अर्थमन्त्री विष्णु पौडेल, उपप्रधान तथा सहरी विकासमन्त्री प्रकाशमान सिंह र राष्ट्र बैंकका गभर्नर डा. विश्व पौडेलसँग भेट गरेका थिए ।