काठमाडौं- वीरगञ्ज भन्सार कार्यालयले चालु आर्थिक वर्षका पहिलो चार महिनामा पेट्रोलियम पदार्थ र सवारीसाधन आयातबाट मात्र ३३ अर्ब रुपैयाँभन्दा बढी राजस्व उठाएको छ।

कार्यालयका अनुसार पाँच प्रकारका पेट्रोलियम पदार्थको आयातबाट रु २२ अर्ब ९० करोड र यातायातका साधन एवं तीनका पार्टपुर्जाबाट रु १० अर्ब १० करोड राजस्व उठाएको हो । 

कार्यालयले चालु आवको चार महिनामा  फलाम तथा फलामबाट बनेका सामानबाट रु चार अर्ब ५८ करोड,  कपडाबाट रु चार अर्ब २५ करोड, मेसिनरी तथा पार्टपुर्जाको आयातबाट रु तीन अर्ब १७ करोड राजस्व संकलन गरेको छ । 

इलेक्ट्रिक मेसिनरी, उपकरण र तिनका पार्टपुर्जा आयातबाट रु तीन अर्ब सात करोड राजस्व संकलन गरेको छ । चालु आवको चार महिनामा वीरगञ्जबाट रु दुई खर्ब ८४ अर्ब ८९ करोड मूल्य बराबरका वस्तु आयात भएका छन् । कार्यालयले चालु आवमा रु ७५ अर्ब ५९ करोड राजस्व संकलन गरेको जनाएको छ ।