काठमाडौं- नेपालका लागि टीभीएस मोटर कम्पनीको आधिकारिक वितरक जगदम्बा मोटर्स प्रालिले धरानमा नयाँ टीभीएस एनटर्क १५० स्कुटर सार्वजनिक गरेको छ।

बहुप्रतीक्षित गायक बिपुल क्षेत्रीको कन्सर्टबीच सार्वजनिक गरिएको उक्त स्कुटरलाई नेपालकै पहिलो १५० सीसी हाइपर स्पोर्ट स्कुटरका रूपमा प्रस्तुत गरिएको छ। लाइभ संगीतको उत्साहबीच गरिएको सार्वजनिकरणले स्कुटरको खेलकुदीय स्वरूप र युवा लक्षित विशेषतालाई समेत जोडेको थियो।

कार्यक्रममा टीभीएसका ग्राहक तथा समर्थक, सञ्चारकर्मी, सामग्री निर्माता, डिलर तथा अतिथिको उल्लेखनीय सहभागिता रहेको थियो। कार्यक्रममा बिपुल क्षेत्री, पारस अटोमोबाइल–टीभीएस इटहरीका प्रबन्ध निर्देशक पौरख लुइँटेल र जगदम्बा मोटर्सकी वरिष्ठ बजार व्यवस्थापक करुणा पुडासैनीले संयुक्त रूपमा टीभीएस एनटर्क १५० को अनावरण गरेका थिए।

पूर्वी नेपालमा टीभीएस एनटर्क ब्रान्डका लागि महत्वपूर्ण मानिएको उक्त कार्यक्रममा नयाँ स्कुटरका विशेषता र प्रविधिबारे समेत जानकारी दिइएको थियो।

टीभीएस एनटर्क १५० मा १४९।७ सीसी क्षमताको हावाबाट चिस्याइने इन्जिन जडान गरिएको छ। उक्त इन्जिनले ७ हजार आरपीएममा १३।२ पीएस शक्ति र ५ हजार ५ सय आरपीएममा १४।२ एनएम टर्क उत्पादन गर्छ। स्कुटरले शून्यदेखि ६० किलोमिटर प्रतिघण्टाको गति ६।३ सेकेन्डमा हासिल गर्ने र अधिकतम गति १०४ किलोमिटर प्रतिघण्टा रहेको कम्पनीले जनाएको छ।

स्टेल्थ विमानबाट प्रेरित डिजाइनमा तयार गरिएको स्कुटरमा बहुबिन्दु प्रोजेक्टर हेडलाइट, वायुगतिकीय विङलेट, जेटबाट प्रेरित भेन्ट, रंगीन एलोय ह्विल, मोटरसाइकल शैलीको ह्यान्डलबार तथा ‘टी’ आकारको पछाडिको बत्ती राखिएको छ। यसको स्पोर्टी स्वरूप, आकर्षक डिजाइन तथा विशेष मफलर ध्वनिले एनटर्क ब्रान्डको रेसिङ विशेषतालाई झल्काउने कम्पनीको दाबी छ।

सार्वजनिकरणका अवसरमा जगदम्बा मोटर्सकी वरिष्ठ बजार व्यवस्थापक करुणा पुडासैनीले एनटर्कले आफ्नो कार्यक्षमता, प्रविधि र फरक डिजाइनमार्फत नेपालका युवा राइडरसँग बलियो सम्बन्ध बनाएको बताइन्।

उनले नयाँ एनटर्क १५० मार्फत उक्त विरासतलाई अझ शक्तिशाली उत्पादनका साथ अगाडि बढाउन खोजिएको बताउँदै धरानमा बिपुल क्षेत्रीको कन्सर्टबीच स्कुटर सार्वजनिक गर्न पाउनु विशेष अवसर भएको उल्लेख गरिन्।

उनका अनुसार धरान टीभीएसका लागि महत्वपूर्ण बजार हो। यहाँ युवा तथा नयाँ सोच भएका राइडरको बलियो समुदाय रहेको भन्दै एनटर्क १५० को सार्वजनिकरणमार्फत यस क्षेत्रमा आफ्नो उपस्थितिलाई अझ बलियो बनाउने लक्ष्य रहेको बताइन्।

टीभीएस एनटर्क १५० मा स्मार्ट कनेक्ट प्रविधिसहित ५० भन्दा बढी जोडिएका सुविधा उपलब्ध छन्। यसमा पालोअनुसारको बाटो देखाउने सुविधा, अन्तिम पटक पार्क गरिएको स्थानको जानकारी, फोन तथा सन्देशको सूचना र विभिन्न राइडिङ मोडलगायतका सुविधा रहेका छन्।

राइडरको सुरक्षा, आत्मविश्वास र सहजतालाई ध्यानमा राख्दै स्कुटरमा एकल च्यानल एबीएस, ट्र्याक्सन कन्ट्रोल, हाजार्ड बत्ती तथा फलो–मी हेडलाइट उपलब्ध छन्। त्यस्तै टेलिस्कोपिक सस्पेन्सन, समायोजन गर्न मिल्ने ब्रेक लिभर, विशेष केन्द्र स्ट्यान्ड तथा २२ लिटर क्षमताको सिटमुनिको भण्डारण स्थानले दैनिक प्रयोगलाई सहज बनाउने कम्पनीले जनाएको छ।

टीभीएस एनटर्क १५० तीन रंगमा उपलब्ध छ। स्टेल्थ सिल्भर, रेसिङ रेड र टर्बो ब्लू रंगमा उपलब्ध स्कुटरको प्रारम्भिक मूल्य ३ लाख ६९ हजार ९ सय रुपैयाँ तोकिएको छ।

यो स्कुटर नेपालभर रहेका जगदम्बा मोटर्सका आधिकारिक डिलरबाट उपलब्ध हुने कम्पनीले जनाएको छ।