शनिबार पर्सामा कोरोना संक्रमण पुष्टि भएका तीनजना भारतीय नागरिक रहेको खुलेको छ । संक्रमण पुष्टि भएकामध्ये २ जना उत्तरप्रदेश र एक जना दिल्लीमा बस्दै आएका नागरिक भएको खुलेको हो । 

सप्तरीमा आयोजित मुस्लिम धार्मिक सभामा सहभागी हुन आएका उनीहरु १३ दिनदेखि वीरगञ्ज–२ छपकैयास्थित जामे मस्जिदमा बस्दै आएका थिए । 

घर फर्कन मार्च ४ तारिकमा फर्कने ट्रेन टिकेट लिएको भए पनि लकडाउनका कारण रोकिएका उनीहरुले  फेरी १५ अप्रिलका लागि टिकट काटेका छन् । 

तर घर फर्कनुअघि एकपटक स्वास्थ्य जाँच गराउनु उपयुक्त सम्झेर उनीहरु आफैं नारायणी अस्पतालमा पुगेका थिए । 

कार्यक्रमका लागि भारतबाट  आएका २४ जना मस्जिदमा बस्दै आएका छन् । उनीहरुलाई प्रहरीसँग समन्वय गरेर बेग्लै राखएिको को मस्जिदका मौलाना अलि असगरले बताए ।

उनीहरु २४ जना सहित ३३ जनाको नमुना संकलन गरी गत बिहीबार परीक्षणका लागि हेटौंडा प्रयोगशाला पठाइएको थियो । जसमध्ये तीन जनाको प्रारम्भिक रिपोर्ट मिश्रित खालको आएको र पुनः परीक्षणका लागि टेकु पठाइएको थियो । 

टेकुस्थित राष्ट्रिय जनस्वास्थ्य प्रयोगशालामा नमुना परीक्षण गर्दा तीनजनामा कोरोना संक्रमण पोजेटिभ देखिएको हो ।

हेटौंडाको प्रयोगशालामा पोजेटिभ देखिएपछि शुक्रबार नारायणी अस्पताललाई जानकारी गराइएको थियो । 

शुक्रबार नै उनीहरुलाई जामे मस्जिदबाट  नारायणी अस्पतालको आइसोलेसनमा राखिएको बताइएको छ ।