भरतपुर महानगरपालिका–२७ घर भएका कालीराम महतो १०–१५ जना कामदारहरु राखेर गाउँघरमा घर बनाउने ठेक्कापटाको काम गर्थे । 

कालीरामले छोरा अविनाश महतोलाई पनि सँगै काममा राख्थे । अविनाशसँग गाउँकै विनोद महतो, विजय महतो, दिपेन्द्र महतो र यमकुमार महतो पनि काम गर्थे । सबैले सबैलाई विश्वास पनि उत्तिकै गर्थे । 

उनीहरुले भरतपुर महानगरपालिका–२७ स्थित भंगाह चोकका सिखाराम महतोको घर ठेक्कामा लिएर बनाइरहेका थिए । घटना हो मंसिर १२ गतेको । 

घरधनी सिखारामले ढलानको काम सकिएको भन्दै ३ बजेतिर काम सकेर उनीहरुलाई कुखुरा काटेर भोज खुवाएका थिए । भोजमा रक्सी पनि थियो । हल्का रक्सी पिइसकेका अविनाश बेलुकी करिब ६ बजेतिर घर जान्छु भन्दै निस्के साथीहरुसँगै । 

नयाँ पटिहानी चोक पुगेपछि उनीहरुले फेरि रक्सी थप्न सुरु गरे । साथीहरु धन बहादुर महतो, सुकराम महतो र अविनाश गरी ४ जना नयाँ पटिहानी चोकको ग्रिन चिल्ली रेस्टुरेन्टमा बसेर २ वटा बियर र १ प्लेट सुकुटी खाए । 

खाइसकेर सुकराम र अविनाश पर्साढापस्थित घर जाने भन्दै हिँडे । चिसोका कारण डम्म हुस्सु लागिसकेको थियो । 

अलि पर पुगेपछि सुकरामले अविनाशलाई देखेनन् । पछाडि आउँदै होला, हुस्सुले नदेखिएको होला भन्ठाने । त्यति चासो गरेनन् । सरासर आफ्नो घर गए र खाना खाएर सुते । तर अविनाश भने पुरानो पटियानीतिर लागिसकेका थिए ।

साँझ करिब ७ः४२ बजे पटियानी पुगेका अविनाशले लगातार ४ पटक यमकुमारको बहिनीलाई फोन गरे । अन्तिममा यमकुमारको बहिनीको फोन उठ्यो । 

फोनको क्रममा ‘म हिजो तिमीलाई भेट्ने आशामा राती तिम्रै घरमा बसें । तर, तिमीसँग भेट भएन । आज म तिम्रै घर नजिकै छु जसरी नि भेट्न आउ’ भने ।

राति करिब ९ बजेतिर यमकुमारको बहिनी पिसाब फेर्ने बहानामा बाहिर निस्किइन् । अविनाशलाई घरको पछाडी उभिएका देखेर उनी सिधै त्यहाँ पुगिन् । 

अविनाशले उनलाई हातमा समातेर नजिकै पराल राखेको ठाउँमा लगे । लगत्तै शारीरिक सम्पर्क गर्न खोजे । खासखुस गरेको आवाज केटीको दाइ दीपेन्द्रले थाहा पाए । 

नयाँ बन्दै गरेको घर थियो । झ्याल थिएन । दीपेन्द्रले उनीहरुलाई देखे । दीपेन्द्र एक्कासी त्यहाँ पुगेर अविनाशलाई समातेर कुटपिट गर्न थाले । 

कुटपिट गरेको खबर गाउँभरी फैलियो । अनि यमकुमार, विनोद, विजय पनि पुगे र सबै मिलेर काठको चिर्पट लगायतले निर्घात कुटपिट गरे । कुटपिटकै क्रममा अविनाशको मृत्यु भयो ।