काठमाडौँ - अनलाइन ट्याक्सी तथा बाइक सेवा दिने गरी ई ड्राइभ नेपाल प्रालिले वैशाखको पहिलो हप्तादेखि सेवा बिस्तार गरी लुम्बिनी प्रदेशमा सुरु गर्ने भएको छ।
ई ड्राइभ नेपाल प्रालिका अध्यक्ष राजेश मास्केले इलेक्ट्रिक साधनमा जोड दिने गरी सेवा चलाएको बताउँदै लुम्बिनी प्रदेश पछि अन्य प्रदेशमा पनि सुरुवात गर्ने योजना रहेको बताए । नेपालमा दर्ता भएर आफूहरू चलेको हुँदा सुरक्षित हुने दाबी गरे । कार्यक्रममा ई ड्राइभ लुम्बिनी प्रालिका अध्यक्ष राजकुमार गुप्ताले नेपालमै तयार भएको एप र मुख्य गरी बिजुली गाडीलाई प्राथमिकता राखेर वैशाखको पहिलो हप्तादेखि सुरु गर्ने बताए। उनले सुरुमा बुटवल भैरहवामा पहिले सुरु गर्दै र त्यसपछि कपिलवस्तुको चन्द्रोट्रा , पाल्पा , नवलपरासीको बर्दघाट सम्म चल्ने बताए । उनले नेपाल सरकारबाट निर्धारण गरिएको भाडा दर नै कायम गरिने उनले बताए ।
स्थानीय युवाहरूलाई आफ्नै ठाउँमा रोजगारको अवसर दिने गरी सेवा सुरु गरिएको उनले बताए । ड्राइभर र प्यासेन्जरलाई चलाउन सरल रहेकोले नै यो एपलाई लुम्बिनी प्रदेशमा ल्याइएको उनले बताए। हाललाई दर्ता शुल्क नराखिएको भन्दै केही समयपछि भने न्यून शुल्क राखिने जनाएको छ । अध्यक्ष मास्केले पहिचान मिल्ने गरी सवारीमा स्टिकर, चालकलाई ज्याकेट समेत उपलब्ध गराइएको बताए। अनलाइन सवारीमा दुर्घटनामा घाइते भए ७० हजार रुपैयाँ र मृत्यु भएको खण्डमा ७ लाख रुपैयाँ बराबरको तेस्रो पार्टीबाहेकको ईन्सुरेन्सको व्यवस्था रहने उनले बताए। निकट भविष्यमा कोसी र गण्डकीमा समेत सेवा बिस्तार गर्ने लक्ष्य रहेको उनले बताए । प्रालिका डाइरेक्टर विशाल भण्डारीले सेवा शुभारम्भको अवसरमा राईडमा ५० प्रतिशत छुट रहने बताए । उनले विशेष अफरहरू पनि चलाउने योजना रहेको जानकारी दिए ।
प्रतिक्रिया