अमेरिकाको लस एन्जलसस्थित क्यालिफोर्निया विश्वविद्यालयमा भएको हिंसामा प्रहरीको कारबाहीप्रति क्यालिफोर्नियाका गभर्नरको कार्यालयले आलोचना गरेको छ।

मास्क लगाएका इजरेल समर्थक समूहले प्रहरी अधिकारीहरू बोलाइनुअगाडि नै प्यालेस्टिनी समर्थक विद्यार्थीको एउटा शिविरमाथि हमला गरेका थिए।

गभर्नर ग्याभिन न्यूसमका प्रवक्ताले प्रहरीको “सीमित र ढिला गरी गरिएको” कारबाही “अस्वीकार्य” रहेको बताए।

बुधवार सयौँ प्रहरी अधिकारीहरू क्याम्पस परिसर र वरिपरि तैनाथ थिए।

राज्यका अधिकारीहरू तथा विश्वविद्यालयका अधिकारीहरूले मङ्गलवार मध्यरातमा झडप हुनेबित्तिकै तत्काल सुरक्षाकर्मीलाई प्रदर्शनकारी बसेका स्थानवरपर तैनाथ गरिएको बताएका छन्।

तर घटना भएका बेला त्यस क्षेत्रमा रहेका कैयौँ मानिसले प्रहरीले तत्काल कारबाही नथालेको बताएका थिए। 
बिबिसीबाट