काठमाडाैं- नेपालको पहिलो र एकमात्र शतप्रतिशत भिट्रिफाइड टाईल्स उत्पादक कम्पनी, लुम्बिनी सेरामिक्स लिमिटेडले नेपाली सर्वसाधारणका लागि प्राथमिक शेयर निष्काशन (आईपीओ) जारी गर्ने घोषणा गरेको छ। यो कदम केवल व्यवसायिक विस्तारको लागि मात्र नभई नेपाली उपभोक्ताहरुलाई अन्तर्राष्ट्रिय स्तरको उत्कृष्ट टाईल्स प्रदान गर्ने उद्देश्यले उठाइएको महत्वपूर्ण निर्णय हो।

समकालीन औद्योगिक क्रान्तिको प्रतिनिधित्व गर्ने लुम्बिनी सेरामिक्सले धितोपत्र दर्ता तथा निष्काशन सम्बन्धी नियमावलीअनुसार नियामक स्वीकृति प्राप्त गरी आउँदो छ महिनाभित्र आईपीओ ल्याउने योजना बनाएको छ। यसका लागि कम्पनीले नबिल इन्भेष्टमेण्ट बैंकिङ्ग लिमिटेडलाई शेयर निष्काशन तथा बिक्री प्रबन्धकको रूपमा नियुक्त गरेको छ। कम्पनीका संचालक श्याम सुन्दर खेतान र नबिलका प्रमुख कार्यकारी अधिकृत मनिष नारायण जोशीबीच सम्पन्न हस्ताक्षरले यस ऐतिहासिक निर्णयलाई थप सशक्त बनाएको छ।

लुम्बिनी सेरामिक्सले नेपाली उपभोक्ताका लागि उच्चतम गुणस्तरको उत्पादन ल्याउँदै आइरहेको छ। विशेषगरी, यसको 'लामिनार टाईल्स' लाई बजारमा व्यापक रूपमा रुचाइएको छ। शतप्रतिशत भिट्रिफाइड टाईल्सको रूपमा चिनिएको यो उत्पादन टिकाउपन, सौन्दर्य र आधुनिक प्रविधिको अद्भुत संयोजनको प्रतीक बनेको छ। कम्पनीका अध्यक्ष सुब्रत धितालले आईपीओको महत्वबारे बोल्दै भने, "गुणस्तर र नवीनतामा लगातार सुधार गर्दै, हामी नेपाली औद्योगिक व्यवस्थापनलाई नयाँ उचाइमा पुर्‍याउने लक्ष्य लिएका छौं।"

अत्याधुनिक यूरोपियन प्रविधिसहित बर्दियाको गुलरियास्थित साँढे १२ बिगाहा जमिनमा फैलिएको उत्पादन केन्द्रबाट उच्च-गुणस्तरयुक्त टाईल्स निर्माण भइरहेको छ। ९९.९२ प्रतिशत वाटरप्रुफ क्षमता र उत्कृष्ट कच्चा पदार्थको प्रयोगले अन्य टाईल्सको तुलनामा तीन गुणा बढी टिकाउपन दिने यी टाईल्स नेपाली उपभोक्ताहरूका लागि नयाँ युगको सुरुवातको संकेत हुन्।

लुम्बिनी सेरामिक्सको मुख्य लक्ष्य नेपाली उपभोक्तालाई अन्तर्राष्ट्रिय स्तरको उत्पादन प्रदान गर्दै, विकल्पको विविधता प्रस्तुत गर्नु हो। नेपाली उद्योगमा नयाँ आयाम थप्दै, कम्पनीले न केवल उपभोक्ताहरुलाई उत्कृष्टताको नयाँ युगमा प्रवेश गराउनेछ, तर समग्र औद्योगिक क्षेत्रको विकासलाई पनि तीव्र बनाउनेछ।

यो आईपीओ केवल लगानीको अवसर मात्र नभई नेपालमै अन्तर्राष्ट्रिय स्तरको उत्पादन निर्माण गर्न सकिन्छ भन्ने आत्मविश्वासको प्रतिक बनेर आएको छ। नेपाली उद्योगको नयाँ अध्यायको थालनी गर्ने लुम्बिनी सेरामिक्सको यो कदमले गुणस्तर, नवीनता र औद्योगिक उत्कृष्टताको परिभाषा नै बदल्नेछ।