काठमाडाैं- विश्वकै अग्रणी नयाँ ऊर्जा सवारी निर्माता बीवाईडी (BYD) ले आफ्नो मुख्यालय सेनझेनमा डिपाईलट एडभान्स्ड इन्टेलिजेन्ट ड्राइभिङ असिस्टेन्स सिस्टम (डिपाईलट सिस्टम) सार्वजनिक गरेको छ। यस प्रविधिले बीवाईडीलाई स्मार्ट ड्राइभिङको क्षेत्रमा नयाँ उचाइमा पुर्‍याउनेछ। डिपाईलट ६००, डिपाईलट ३००, र डिपाईलट १०० नामक संस्करणहरू सहित यो प्रणालीले सुरक्षित, सहज र अत्याधुनिक स्वचालित ड्राइभिङ अनुभव प्रदान गर्नेछ।

बीवाईडीले यस नयाँ प्रविधिलाई आफ्ना सबै मोडेलहरूमा बिना कुनै अतिरिक्त शुल्क प्रदान गर्ने घोषणा गरेको छ। आश्चर्यजनक रूपमा, सबैभन्दा किफायती मोडल 'सिगल' मा समेत यो सुविधा उपलब्ध हुनेछ, जसको प्रारम्भिक मूल्य मात्र ९,५५५ अमेरिकी डलर रहेको छ। यो निर्णयले स्वचालित ड्राइभिङ प्रविधि अब केवल महँगा गाडीहरूमा सीमित नरही आम उपभोक्ताका लागि पनि सहज रूपमा उपलब्ध हुने संकेत गर्छ।

बीवाईडीका सीईओ वाङ छुवान्फुले यस अवसरमा भने, “राम्रो प्रविधि हरेक व्यक्तिको पहुँचमा हुनुपर्छ। बीवाईडीको लक्ष्य भनेकै स्मार्ट ड्राइभिङलाई सर्वसुलभ बनाउनु हो।”

डिपाईलट सिस्टम तीन भिन्न संस्करणहरूमा उपलब्ध छ। डिपाईलट ६०० मा तीनवटा लिडार समावेश गरिएको छ, जुन मुख्य रूपमा याङवाङ मोडेलहरूमा प्रयोग गरिन्छ। डिपाईलट ३०० मा एउटामात्र लिडार रहेको छ, जुन डेन्जा तथा केही बीवाईडी मोडेलहरूमा उपलब्ध हुनेछ। डिपाईलट १०० मा तीनवटा क्यामेरा जडान गरिएको छ, जसलाई विभिन्न बीवाईडी मोडेलहरूमा प्रयोग गर्न सकिन्छ।

डिपाईलट प्रणालीले अत्याधुनिक प्रविधिहरूको प्रयोग गर्दै राजमार्ग, शहरी सडक, र जटिल ट्राफिक अवस्थामा पनि सहज नेभिगेसन प्रदान गर्नेछ। हाई स्पिड नेभिगेसन अन अटोपाईलट (HSNA) को माध्यमबाट राजमार्गमा स्वचालित रूपमा लेन परिवर्तन गर्ने, ट्राफिक अवरोधहरू चिनेको आधारमा निर्णय लिने, तथा सुरक्षित र स्थिर गतिमा गाडी चलाउने सुविधा प्राप्त हुन्छ।

अटोमेटेड भ्याले पार्किङ (AVP) प्रविधिले चालकले गाडी छोडेपछि स्वचालित रूपमा पार्क गर्ने तथा ड्रप–अफ र गो प्रणालीमार्फत थप सहजता प्रदान गर्नेछ। मेमोरी नेभिगेसन अन अटोपाईलट (MNA) ले बारम्बार प्रयोग गरिने मार्गहरू पहिचान गरी ट्राफिक बत्तीमा रोकिने, मोड पार गर्ने, तथा ट्राफिक स्थितिअनुसार स्वचालित रूपमा गति समायोजन गर्ने क्षमता राख्छ।

डिपाईलट १०० ले १,००० किलोमिटर सम्म बिना म्यानुअल हस्तक्षेप यात्रा गर्न सक्छ। अटोमेटिक एमरजेन्सी ब्रेकिङ (AEB) प्रणाली को मद्दतले १०० किमी/घन्टाको गतिमा गाडी भरपर्दो रूपमा रोक्न सक्छ। भविष्यमा यो प्रणाली १२० किमी/घन्टा र १४० किमी/घन्टा को गति सम्हाल्ने गरी परिमार्जन गरिँदैछ।

बीवाईडीले यस क्षेत्रमा ५,००० भन्दा बढी इन्जिनियरहरू संलग्न गराएको छ। हालसम्म, ४४ लाखभन्दा बढी बीवाईडी सवारीसाधनहरूमा स्मार्ट ड्राइभिङ प्रविधि जडान भइसकेको छ।

नयाँ ऊर्जा सवारी उद्योगको अग्रणी कम्पनीको रूपमा, बीवाईडीले 'सुखद जीवनका लागि प्रविधिगत नवप्रवर्तन' भन्ने मूल मन्त्रलाई आत्मसात गर्दै अघि बढिरहेको छ। डिपाईलट इन्टेलिजेन्स रणनीतिमार्फत सुरक्षित, दिगो, र स्मार्ट यातायात समाधानहरू उपलब्ध गराउँदै विश्वभरको अटोमोबाइल उद्योगलाई पूर्ण रूपान्तरण गर्न प्रतिबद्ध छ।

अब, ड्राइभिङको भविष्य तपाईंको हातमा होइन – तपाईंको गाडी आफैं चल्नेछ!