काठमाडौं- तेह्रथुम पावर कम्पनीको हकप्रद सेयरमा आवेदन दिने म्याद थप गरिएको छ।

धितोपत्र बिक्री प्रबन्ध नबिल इन्भेस्टमेन्ट बैंकिङले तेह्रथुम पावरको हकप्रद सेयरमा साउन ११ गतेसम्म आवेदन दिन सकिने जनाएको हो। यसअघि आज साउन ४ गतेसम्म आवेदन दिने समयसीमा रहेकोमा मागबमोजिम आवेदन नपरेपछि म्याद थप गरिएको हो।

कम्पनीले गत असार १६ गतेबाट आफ्ना सेयरधनीहरुलाई हकप्रद सेयर खुला गरेको हो। 

नेपाल धितोपत्र बोर्डले तेह्रथुम पावरलाई हाल कायम चुक्तापुँजी ४० करोड रुपैयाँको १ः१ अनुपातमा अर्थात १०० प्रतिशत हकप्रद सेयर जारी गर्न अनुमति दिएको छ। कम्पनीले १०० रुपैयाँ अंकित दरका कुल ४० लाख कित्ता हकप्रद सेयर आफ्ना शेयरधनीहरुलाई बिक्री खुला गरेको छ।

लगानीकर्ताले धितोपत्र बोर्डबाट अनुमति प्राप्त आस्वा सेवामा सहभागी बैंक तथा वित्तीय संस्था, तिनले तोकेका शाखा र सीडीएससीको मेरो सेयरबाट आवेदन दिन सक्नेछन्। धितोपत्र बिक्री प्रबन्धक नबिल इन्भेस्टमेन्ट बैंकिङको काठमाडौं नक्सालस्थित कार्यालय, नबिल बैंकको तेह्रथुममा रहेका शाखाहरु छत्तर, म्याङ्लुङ, फेदाप र संक्रान्तिबजार तथा तेह्रथुमको मेन्छयाममा रहेको कुमारी बैंकको शाखाबाट पनि शेयरधनीहरुले हकप्रद शेयरमा आवेदन दिन सक्नेछन्।

तेह्रथुम पावरले हकप्रद सेयर निष्कासन प्रयोजनार्थ गत जेठ ५ गते बुक क्लोज गरेकाले जेठ ४ गतेसम्म कायम सेयरधनीहरुले मात्रै यो हकप्रदमा आवेदन दिन पाउनेछन्।