काठमाडौं- टीभीएस मोटर कम्पनीले नेपालमा आयोजित टीभीएस अपाचे रेसिङ एक्सपिरियन्स (ARE) जीपीमा उत्कृष्ट प्रदर्शन गर्ने तीन नेपाली राइडरहरूलाई अन्तर्राष्ट्रिय फाइनलका लागि छनोट गरेको छ। छनोट हुने राइडरहरूमा १६० सीसी विधाबाट अभिनव राज मल्ल, २०० सीसीबाट दिलीप दनुवार र ३१० सीसीबाट सुजन थापा मगर रहेका छन्। यी राइडरहरूले अप्रिल २ देखि ५ सम्म भारतको चेन्नईस्थित मद्रास इन्टरनेसनल सर्किटमा हुने फाइनल प्रतिस्पर्धामा नेपालको प्रतिनिधित्व गर्नेछन्, जहाँ विभिन्न देशका अनुभवी राइडरहरूबीच कडा प्रतिस्पर्धा हुने अपेक्षा गरिएको छ।

एआरई जीपी एउटा यस्तो प्लेटफर्म हो जसले उदीयमान रेसिङ प्रतिभाहरूलाई व्यावसायिक ट्रयाक अनुभव हासिल गर्ने र अन्तर्राष्ट्रिय मञ्चमा आफ्नो क्षमता प्रदर्शन गर्ने अवसर प्रदान गर्दछ। मद्रास इन्टरनेसनल सर्किट प्राविधिक रूपमा चुनौतीपूर्ण मानिन्छ, जहाँ राइडरहरूको गति, नियन्त्रण र धैर्यको कडा परीक्षण हुनेछ। टीभीएस मोटर कम्पनीले टीभीएस रेसिङमार्फत नयाँ पुस्ताका राइडरहरूलाई प्रोत्साहन गर्दै विभिन्न बजारहरूमा रेसिङ संस्कृतिको विकासमा महत्त्वपूर्ण योगदान पुर्‍याउँदै आएको छ। अन्तर्राष्ट्रिय मञ्चमा नेपाली राइडरहरूको यो सहभागितालाई नेपालको मोटोस्पोर्ट्स विकासको एक महत्त्वपूर्ण उपलब्धिको रूपमा हेरिएको छ।