काठमाडौं- सरकारले नेपाल आयल निगम लिमिटेडको कार्यकारी निर्देशकमा चार्टर्ड एकाउन्टेन्ट (सीए) नागेन्द्र साहलाई नियुक्त गरेको छ। बुधबार बसेको मन्त्रिपरिषद् बैठकले खुला प्रतिस्पर्धाबाट छनोट भएका उम्मेदवारमध्ये साहलाई चार वर्षका लागि निगमको नेतृत्वको जिम्मेवारी दिने निर्णय गरेको हो।

मन्त्रिपरिषद्को निर्णयसँगै साहले नेपाल आयल निगमको कार्यकारी निर्देशकको जिम्मेवारी सम्हाल्नेछन्। उनी यसअघि निगममा निमित्त कार्यकारी निर्देशकका रूपमा कार्यरत थिए।

उद्योग, वाणिज्य तथा आपूर्ति मन्त्रालयले खुला प्रतिस्पर्धामार्फत कार्यकारी निर्देशक छनोट प्रक्रिया अघि बढाएको थियो। उक्त प्रक्रियामा नागेन्द्र साह, कौशल केसी र सञ्जीवकुमार देव अन्तिम तीन प्रतिस्पर्धीमा परेका थिए। मन्त्रिपरिषद्ले अनुभव, कार्यसम्पादन र प्रस्तुत कार्ययोजनाका आधारमा साहलाई नियुक्त गर्ने निर्णय गरेको हो।

नेपाल आयल निगम मुलुकमा पेट्रोलियम पदार्थको आयात, भण्डारण, ढुवानी तथा वितरणको जिम्मेवारी बोकेको सरकारी स्वामित्वको प्रमुख सार्वजनिक संस्था हो। पछिल्लो समय इन्धन आपूर्ति व्यवस्थापनलाई थप प्रभावकारी बनाउने, भण्डारण क्षमता विस्तार गर्ने, पूर्वाधार विकासलाई गति दिने तथा संस्थागत सुधारलाई सुदृढ बनाउने चुनौती निगमसामु रहेको छ।

नवनियुक्त कार्यकारी निर्देशक साहको नेतृत्वमा सरकारले अघि सारेको कम्तीमा ९० दिनका लागि पुग्ने रणनीतिक पेट्रोलियम भण्डारण क्षमता निर्माण गर्ने योजना कार्यान्वयनले प्राथमिकता पाउने अपेक्षा गरिएको छ। साथै इन्धन आपूर्ति प्रणालीलाई थप भरपर्दो बनाउने, सञ्चालन दक्षता अभिवृद्धि गर्ने तथा निगमको वित्तीय र संस्थागत सुधारलाई अघि बढाउने जिम्मेवारी पनि नयाँ नेतृत्वमाथि रहनेछ।

साहले यसअघि निगमको व्यवस्थापनमा रहँदै इन्धन आपूर्ति, वित्तीय प्रशासन तथा संस्थागत सञ्चालनसँग सम्बन्धित विभिन्न जिम्मेवारी सम्हालिसकेकाले निगमको आन्तरिक संरचना र व्यवस्थापनबारे उनको अनुभव आगामी नेतृत्वका लागि महत्वपूर्ण हुने अपेक्षा गरिएको छ।