यान्गुन – रोहिङ्ग्या मुस्लिम समुदायको नरसंहारसम्बन्धी समाचार सङ्कलन गर्ने रोयटर्स समाचार संस्थासँग आबद्ध दुईजना पत्रकारमाथि लागेको गोपनीयता कानुन उल्लङ्घनको आरोपसम्बन्धी मुद्दाको फैसला एक साताका लागि स्थगित भएको छ ।
राज्यको गोपनीयता कानुन उल्लङ्घनको मुद्दा खेपिरहेका दुबै पत्रकारको फैसला त्यहाँको एक अदालतले आज सुनाउने पूर्व निर्धारित तालिका थियो ।
गत डिसेम्बरदेखि नै रोयटर्सका पत्रकारहरु ३२ वर्षीय वा लोन र २८ वर्षीय क्या सो ओउ म्यान्मारमा कुख्यात इन्सेन जेलमा थुनामा छन् । पत्रकारको रिहाईको माग गर्दै विश्वभरबाट म्यान्मारमाथि दबाब बढेको छ ।
यी दुबै पत्रकारले सेप्टेम्बर २०१७ मा द्वन्द्व प्रभावित रखाइन राज्यमा मारिएका १० जना रोहिङ्ग्या मुस्लिमका बारेमा अनुसन्धान गरिरहेका थिए ।
उनीहरुलाई यान्गुनमा प्रहरीले खाना खान बोलाएको थियो । त्यही समयमा उनीहरुलाई केही कागजात दिइयो । त्यसपछि उनीहरुलाई पक्राउ गरियो । रखाइन राज्यमा सैनिक कारबाही सम्बन्धी गोप्य सामग्री राखेको आरोप उनीहरुमाथि लगाइयो ।
दुबै पत्रकारमाथि औपनिवेशिककालीन राज्य गोपनियता कानुन उल्लङ्घनको आरोप लागेको छ । यस्तो दस्ताबेज राखिए १४ वर्षको जेल सजाय हुन सक्दछ । अदालतको आदेशको पर्खाइमा कुटनीतिक व्यक्तिहरु, सञ्चारकर्मीहरु र शुभेच्छुकहरुको ठूलो भिड अदालतमा लागेको थियो ।
तर जिल्ला न्यायाधीश खिन माउङ माउङले संक्षिप्त सुनुवाई गर्दै मुख्य न्यायाधीश बिरामी भएकाले सेप्टेम्बर ३ मा मात्र आदेश सुनाइने जानकारी दिएका थिए ।
अदालतबाट बाहिर निस्कनेक्रममा पत्रकार वा लोनले फैसला जेसुकै भएपनि आफूहरु भयभित नभएको प्रतिक्रिया दिनुभयो । “हामी सत्य रहेको हामीलाई विश्वास छ र हामीले केही गल्ती गरेकै छनौं ।”
आङ सान सू कीको नेतृत्वमा पनि प्रेस स्वतन्त्रतामा सङ्कट आएको भन्दै सर्बत्र आलोचना पनि शुरु भएको छ । रोहिङ्ग्या समुदायमाथि राज्यको व्यवहारले पनि उहाँको सार्वजनिक छवि अन्तर्राष्ट्रिय स्तरमै खस्किएको छ ।
राष्ट्रसंघीय एउटा मिसनले सोमबार म्यान्मारको मानव अधिकार उल्लङ्घनको अवस्थाबारे प्रतिवेदन सार्वजनिक गर्दैछ र राष्ट्रसंघीय सुरक्षा परिषदमा रोहिङ्ग्या सङ्कटका बारेमा मङ्गलबार छलफल हुनेछ ।
प्रतिक्रिया