केन्द्रीय विद्युत् जडानपछि चौबीसै घण्टा टेलिफोन

भदौ २५, २०७७ | आजको अर्थ
ajaako_artha

केपिलासगढी गाउँपालिका–४ बाक्सिलास्थित धिर्नुडाँडामा रहेको जिएसएम र सिडीएमए टेलिफोन टावरमा केन्द्रीय प्रशारण लाइनको विद्युत् जडान गरिएको छ ।

नियमित विद्युत् अभावमा पटकपटक अवरुद्ध हुँदै आएको टेलिफोन टावरमा विद्युत् जडान भएपछि चौबीसै घण्टा टेलिफोन सञ्चालनमा आएको छ ।

विद्युत् अभावमा गत चैतदेखि अवरुद्ध टेलिफोन टावर मर्मतपछि केन्द्रीय प्रशारण लाइनको विद्युत् जडान गरेर सञ्चालनमा ल्याइएको गाउँपालिका प्रमुख कृष्णकुमार राईले बताए । “विद्युत् अभावमा टेलिफोन गर्न दिउँसोको घाम पर्खनुपर्ने थियो”, उनले भने, “केन्द्रीय प्रशारण लाइनको विद्युत् जडान भएपछि अहिले जुनसुकै समयमा टेलिफोन सम्पर्क गर्न सकिने भएको छ ।”

धिर्नुडाँडाको अवरुद्ध टेलिफोन टावर सञ्चालनमा आएपछि जिल्लाको उत्तरी क्षेत्रका टेलिफोनका सेवाग्राहीलाई सहज भएको छ । दुई वर्षअघि जडान गरेर सञ्चालनमा ल्याइएको टेलिफोन टावर यसअघिसम्म दैनिक बिहान दश बजेदेखि बेलुका पाँच बजेसम्म मात्र सञ्चालन हुँदै आएको थियो ।

थ्री–जी सेवा सञ्चालन हुँदै आएको उक्त टेलिफोन टावरमा केहि दिनभित्रै फोर–जी सेवासमेत सञ्चालन गर्ने तयारी गरिएको नेपाल टेलिकम खोटाङका प्रमुख खगेन्द्र मगरले बताए । “फोर–जी सेवा सञ्चालनका लागि प्राविधिक कामहरु बाँकी नै छ”, उनले भने, “प्राविधिक समस्या हल गरेर चाँडै फोर–जी सेवासमेत सञ्चालनमा ल्याउने तयारी गरिएको छ ।”

धिर्नुडाँडाको टेलिफोन टावरले केपिलासगढी गाउँपालिकाको सबै वडा तथा दिक्तेल रुपाकोट मझुवागढी नगरपालिका, रावाबेँसी गाउँपालिका र ऐसेलुखर्क गाउँपालिकामा समेत काम गर्ने टेलिकमले जनाएको छ । जिल्लामा सञ्चालित सबै टेलिफोन टावरमा फोर–जी सेवा सञ्चालन गर्नेगरि तयारी भइरहेको टेलिकमले जनाएको छ ।

स्थानीय हाइड्रोपावरमार्फत दुई वर्षअघि सञ्चालनमा ल्याइएको उक्त टेलिफोन टावरमा गत चैतदेखि पावर पुर्याउन नसकिएको जनाइएको छ । टेलिफोन टावरमा जडान गरिएको सोलारले समेत दिउसोबाहेक अन्य समयमा काम गर्न छाडेपछि सेवाग्राहीहरुले करीब छ महिनादेखि टेलिफोनको समस्या झेल्दै आएका थिए ।

यसैबीच, दश स्थानीय तह रहेको जिल्लामा यस वर्ष १४ ठाउँमा टेलिफोन टावर जडानको काम भइरहेको टेलिकमले जनाएको छ । बाम्राङ, बराहपोखरी, बतासे, बुइपा, डाँडागाउँ, दिक्तेल, खार्पा, पाथेका, दुवेकोल, ऐसेलुखर्क, देविथान, बाँझेच्यानडाँडा, दोर्पाआहाले र डम्वरखुशिवालयमा जडानको काम भइरहेको हो ।

डाँडागाउँ र ऐसेलुखर्क बाहेक अन्य स्थानमा जडान गरिएको टावरको काम अन्तिम चरणमा पुगेको टेलिकमले जनाएको छ । अहिले जडान भइरहेको टावरमा फाइबरमार्फत फोर–जी सेवाको कामसमेत भइरहेको जनाइएको छ । दुई नगरपालिका र आठ गाउँपालिका रहेको जिल्लामा यसअघि १४ ठाउँमा जडान गरिएको टेलिफोन टावरमार्फत टेलिफोन सेवा सञ्चालनमा छ । जिल्लाको प्रमुख व्यापारिक केन्द्र दिक्तेल बजार, हलेसी, बाक्सिला, खोटाङबजार, ऐसेलुखर्क र सिम्पानीमा ल्याण्डलाइन सेवासमेत सञ्चालनमा रहेको टेलिकमले जनाएको छ ।
 

कमेन्ट गर्नुहोस्

तपाईंको ईमेल गोप्य राखिनेछ ।

This site is protected by reCAPTCHA and the Google Privacy Policy and Terms of Service apply.

बुलियन मार्केट

विनिमय दर

मुद्राखरिदबिक्री
U.S. Dollar१२२.०३१२२.६३
European Euro१३१.६६१३२.३१
UK Pound Sterling१५०.८७१५१.६१
Swiss Franc१२५.०९१२५.७१
Australian Dollar७७.७८७८.१६
Canadian Dollar८६.९२८७.३५
Singapore Dollar८५.६५८६.०८