काठमाडौं - बलिउड अभिनेत्री दीपिका पादुकोणलाई कोरोना संक्रमण पुष्टि भएको छ । 

सेलिब्रेटी फोटोग्राफर विरल भयानीले सोसल मिडियामार्फत् अभिनेत्री दीपिका पादुकोणलाई पनि कोरोना संक्रमण भएको जानकारी दिएका हुन् ।

हाल अभिनेत्री दीपिका श्रीमान रणवीर सिंहको साथमा बेंगलुरुमा रहेका छन् । दीपिका र रणवीर सिंह लकडाउन हुनु अगावै मुम्बई छोडेर बेंगलुरुस्थित आफ्नो घर पुगेका हुन् । 

यस अगाडि अभिनेत्री दीपिकाको परिवारको अन्य सदस्यहरुमा पनि कोरोना देखिएको थियो । लक्षणसहितको कोरोनाले सताए पछि दीपिकाको बुबा प्रकाश पादुकोणलाई अस्पताल भर्ना गरिएको छ । अहिले उनको स्वास्थ्य अवस्था सामान्य हुदै गएको र साताको अन्त्यतिर डिस्चार्ज गरिने बताइएको छ ।

त्यस्तै, उनकी आमा उजाला र बहिनी अनिषालाई पनि कोरोना संक्रमण भएको छ । अहिले उनीहरु दुवै जना होम आइसोलेशनमा रहेका जानकारी गराइएको छ ।