काठमाडौं, तीन वर्षअघि प्रदर्शनमा आएको फिल्म ‘बुलबुल’ का निर्देशक विनोद पौडेलले नयाँ फिल्म ‘रबर सिटी’ को निर्देशन गर्ने भएका छन् । ६ करोडको लागतमा निर्माण हुन लागेको फिल्मका लागि मुख्य कलाकारमा शुशांक मैनालीलाई अनुबन्ध गरिएको छ ।
भुटानबाट नेपाल आएर अमेरिका पुगेका भुटानी शरणार्थीको कथामा बन्न लागेको फिल्ममा किर्तना बाँस्कोटा, अविरल थापा, भक्त रिजाल, यातिन पर्खानी र राजु पौडेलको लगानी रहनेछ । फिल्मको छायांकन अमेरिकामा हुनेछ । बाँस्कोटा प्रोडक्सन र अवेकन प्रोडक्सनको ब्यानरमा बन्ने फिल्मलाई पहिला विभिन्न फेष्टिभलमा प्रिमियर गरेपछि नेपालमा रिलिज गर्ने योजनामा निर्माण टिम छ ।
१४ वर्षदेखि २५ वर्षसम्मको महिला चरित्रका लागि आउँदो डिसेम्बरमा अडिसन लिने तयारीमा निर्माण टिम छ ।
अंकित पौडेलले खिच्ने फिल्मको कथा निर्देशक पौडेलको हो ।अमेरिकाको ओहायो राज्यको एक्रोन शहरलाई पहिले रबर सिटी भनिन्थ्यो र भुटानी शरणार्थीलाई पुनर्वास गराएपछि शहर पुनः गुलजार बनेको थियो । ‘रबर सिटी’ ले भुटानी शरणार्थीको पुनर्वासपछिको कथालाई उठान गर्नेछ ।
कमेन्ट गर्नुहोस्
तपाईंको ईमेल गोप्य राखिनेछ ।