काठमाडौं-  एमजीको आधिकारीक वितरक प्यारामाउन्ट मोटर्सले जेडएस ईभीको स्ट्याण्डर्ड रेन्ज मोडलको दुई भेरियन्टमा बुकिङ खोल्ने भएको छ ।

गतवर्ष फागुन १५ गते पारामाउन्ट मोटर्सले स्ट्याण्डर्ड र लङ रेन्ज गरी दुई मोडल बजारमा सार्वजनिक गरेको थियो । ग्राहकले ५०० यूनिट हाराहारी बुकिङ गरेर बसे पनि सरकारले चालु आर्थिक वर्षको बजेटबाट भन्सार र अन्तःशुल्क बढाएपछि गाडीको आयात भएको थिएन ।

पारामाउन्ट मोटर्सले स्ट्याण्डर्ड रेन्ज मोडलको जेडएस ईभीको लो र हाइ दुई भेरियन्टमा आज बेलुका ७ बजे सोसियल मिडिया मार्फत प्राइस रिभील गर्दै बुकिङ समेत खोल्ने भएको हो । स्ट्याण्डर्ड रेन्ज मोडलका दुवै भेरियन्टमा १०० किलोवाटको मोटर रहेको छ ।

स्ट्याण्डर्ड रेन्ज भएको यो मोडलमा पनि लङ रेन्जको जस्तै  सुरक्षा फिचर तथा इन्फर्मेशन टेक्नोलोजी लगाएत अन्य फिचरहरु समान रहेको छ । दुई भेरियन्टमा लन्च हुने स्ट्याण्डर्ड रेन्जको हाइमा शनरुफ, भेन्टीलेटेड तथा हिटेड सिट फिचर सुविधाका साथमा लेदरेट सिट छ भने लो भेरियन्टमा यी सुविधा छैन ।

पारामाउन्ट मोटर्सले केही दिनअघि नै लङ रेन्ज मोडलको विक्री सुरू गरेको थियो । ८१ लाख ९९ हजार रुपैयाँ मूल्य तोकेर लङ रेन्ज जेडएस ईभीमा ७२।६ किलोवाट आवरको ब्याट्री प्याक र १३० किलोवाटको मोटर रहेको छ ।

कम्पनीले स्ट्याण्डर्ड मोडलको एमजी जेडएस ईभीमा ५१.१ किलोवाट आवरको सीएटीएलको ब्याट्री प्याक दिएको छ । जुन पुरानो जेडएस ईभीमा भन्दा ठूलो साइजको ब्याट्री प्याक हो । पुरानो जेडएस ईभीमा ४४.५ किलोवाट आवरको ब्याट्री प्याक रहेको थियो ।

पारामाउन्ट मोटर्सले स्टरयाण्डर्ड रेन्ज जेडएस ईभीको मूल्य ४५ देखि ५५ लाख हाराहारीमा राख्ने अनुमान गरिएको छ ।