काठमाडाैँ-  धितोपत्र बोर्डमा यतिबेला हरि विजोग नै छ भन्दा फरकपर्दैन । अध्यक्ष नहुँदा सुनसान छ । सरकारले धितोपत्र बोर्डको अध्यक्ष नियुक्ती नहुँदा अबौं रुपैयाँको आइपिओ निष्कासन रोकिएको छ ।  अहिले अर्थमन्त्रालय बजेट लेखनमा व्यस्थ रहेको हुँदा बजेटपछि मात्र  नियुक्ती पक्रिया अघि बढाउने अध्यक्ष छनोट समितिको संयोजक तथा योजना आयोगको उपाध्यक्ष मीनवहादुर श्रेष्ठले बताएका छन् ।  त्यसैले   अध्यक्ष नियुक्ती पक्रिया अझै लम्बिन सक्ने छ । अहिले यसैपनि सरकारको फेरबदलकोहल्लाले राजनीतिक अर्को दिशा तर्फ उन्मुख भइरहेको यो समयले पनि कता मोडिन्छ यसै भन्न सकिन्न । 

अध्यक्षका लागि पाँच जनाको सर्ट लिस्टमा परेको छ । जसमा नेप्सेमा हालको सिइओ कृष्णवहादुर कार्की, तत्कालीन बीमा समितिका अध्यक्ष हाल (प्राधिकरण)पूर्व अध्यक्ष चिरञ्वि चाँपागाई, सन्तोष श्रेष्ठ र धितोपत्र बोर्डका कार्यकारी निर्देश मुक्तीनाथ श्रेष्ठ र डा. नवराज अधिकारी रहेका छन् । आइपिअ‍ो निष्कासनमा रोकिँदा जलविद्युत कम्पनीको आयोजनामा गम्भिर प्रभाव पर्ने गरेको स्वतन्त्र उर्जा उत्पादनहरुको संस्था इम्पानले जनाएको छ । 

१० महिनादेखि शेयर निष्काषन प्रक्रिया रोकिँदा जलविद्युतका आयोजनाको निर्माण प्रभावित बनेको इम्पानको भनाई छ ।  प्राथमिक(आइपीओ) र  हकप्रद शेयर निष्काषनका लागि आवेदन दिएका २७ सहित ३० भन्दा बढी जलविद्युत आयोजनाको शेयर निष्काषन प्रक्रिया १० महिनादेखि रोकिएको छ । नेपाल धितोपत्र बोर्डमा रमेश हमाल अध्यक्ष हुँदैदेखि रोकिएको शेयर निष्काषन प्रक्रिया नयाँ अध्यक्ष नियुक्त नहुँदा अहिलेसम्म ठप्प भएको हो । लामो समयसम्म आयोजनाको शेयर निष्काषन गर्न नपाउँदा आयोजनाको निर्माण प्रभावित भएको प्रवर्द्धकहरुले बताएका छन् ।

गत आर्थिक वर्षमा ४२ कम्पनीको आइपीओ जारी भएकोमा २९ वटा जलविद्युत कम्पनीहरु रहेका थिए । तर चालू आर्थिक वर्षमा भने गत भदौ ५ गते भिजन लुम्बीनी ऊर्जा कम्पनीको आइपीओ जारी हुनुबाहेक अरु कुनै पनि जलविद्युत कम्पनीको आइपीओ निष्काषन भएको छैन ।  अहिले एउटा सोलार सहित १८ वटा विद्युत उत्पादन कम्पनीले आइपीओ निष्काषनका लागि अनुमति माग गर्दै सेबोनमा निवेदन दिएका छन् । अनुमति नै नपाउने आइपीओको लागि किन आवेदन दिनु भन्दै ४ र ५ वटा कम्पनीले आवेदन नै दिएका छैनन् । ती सबै कम्पनीको गरी करीब १४र१५ अर्ब रुपैयाँ बराबरको शेयर निष्काषन प्रक्रिया १० महिनादेखि रोकिएको स्वतन्त्र ऊर्जा उत्पादकहरुको संस्था, नेपाल -इप्पान का अध्यक्ष गणेश कार्कीले जानकारी दिए ।
त्यस्तै हकप्रद शेयर निष्काशनका लागि आवेदन दिएका ९ जलविद्युत कम्पनीले पनि अनुमति पाएका छैनन् । ९ कम्पनीले हकप्रद निष्काषन गर्न लागेको रकम झण्डै ७ अर्ब रुपैयाँ रहेको कार्कीले जानकारी दिए ।

यस अघि बोर्डले गत पुसमा अन्तिम पटक जलविद्युत कम्पनीलाई हकप्रद शेयर निष्काषनको लागि स्वीकृति दिएको थियो । त्यसयता ९ कम्पनीले हकप्रद शेयर निष्काषनको अनुमति माग्दै बोर्डमा दिएको निवेदन अलपत्र परेका छन् । गत आर्थिक वर्षमा ८ वटा कम्पनीले हकप्रद शेयर निष्काषनको अनुमति पाउँदा ७ वटा जलविद्युत आयोजना प्रवर्द्धक कम्पनी रहेका थिए । हकप्रद शेयरमा पनि अनुमति नै नपाउने भए किन खर्च गर्नु भन्दै धेरै कम्पनीहरु बोर्डमा नगएको कार्कीले जानकारी दिए ।

जलविद्युत कम्पनीहरुले आइपीओ तथा हकप्रद शेयर जारीगरेपछि आउने रकमलाई आयोजना निर्माणमा खर्च गर्ने योजना सहित काम अघि बढाएका हुन्छन् । तर, सेबोनले शेयर निष्काषनको अनुमति नदिएपछि थप २०र२२ अर्ब रुपैयाँ कहाँबाट जोहो गर्ने भन्ने चिन्ता प्रवर्द्धकलाई थपिएको इप्पानका वरिष्ठ उपाध्यक्ष मोहन कुमार डाँगीले बताए । जलविद्युत कम्पनीहरुको आइपीओ तथा हकप्रद शेयर निष्काषनलाई प्राथमिकता दिन सरोकारवाला सबै निकायमा इप्पानले पहल गरेपनि सम्बन्धित निकायबाट तदारुक्ता नदेखाउँदा धेरै विद्युत आयोजनाहरुको निर्माण प्रभावित भइरहेको इप्पानका महासचिव बलराम खतिवडाले जानकारी दिए ।

जलविद्युत आयोजनाले ५० प्रतिशत निर्माण पुरा भएपछि आइपीओ निष्काषनको प्रक्रियामा जान पाउँछन् भने ६० प्रतिशत निर्माण पुरा भएपछि अनुमति पाउने व्यवस्था छ । आइपीओबाट आउने पैसालाई पनि कम्पनीहरुले आयोजना निर्माणमा खर्च गर्नेगरी कार्ययोजना बनाएका हुन्छन् । तर, शेयर निष्काषनको प्रक्रिया नै रोकिएपछि आइपीओ निष्काषनको चरणमा पुगेका अन्य आयोजना समेत प्रभावित भएको प्रवर्द्धकहरु बताउँछन् । अहिले निजी क्षेत्रबाट ३ हजार ५०० मेगावाट क्षमताका बयोजनाहरु निर्माणाधीन रहेका छन् ।