काठमाडौँ - महालेखापरीक्षकको कार्यालयले ६१ औँ वार्षिक प्रतिवेदन राष्ट्रपति रामचन्द्र पौडेल समक्ष पेश गरेको छ । महालेखा परीक्षक तोयम रायले राष्ट्रपति समक्ष ६१ औँ वार्षिक प्रतिवेदन पेश गरेका हुन् ।

महालेखापरीक्षकको ६१ औँ वार्षिक प्रतिवेदनमा ६ परिच्छेद रहेका छन् । जसमा लेखापरीक्षण गरिएका निकायको विवरण, लेखापरीक्षणबाट देखिएको बेरुजु स्थिति, लेखापरीक्षणबाट देखिएको समष्टिगत स्थिति, लेखापरीक्षण प्रतिवेदनको कार्यान्वयन स्थिति, भविष्यमा गर्नुपर्ने सुधार र कार्यालय गतिविधिलाई समावेश गरिएको छ। वार्षिक प्रतिवेदनका सारभूत विषयहरू समावेश गरी छुट्टै महालेखापरीक्षकको ६१ औँ वार्षिक प्रतिवेदन, २०८१ सारांश समेत तयार पारिएको छ ।

नेपालको संविधानको धारा २९४ (३) बमोजिम प्रदेशको काम कारबाहीका सम्बन्धमा ७ वटै प्रदेशको अलग अलग प्रतिवेदन तयार गरी प्रदेश प्रमुख समक्ष पेश गर्न सक्ने व्यवस्था छ । लेखापरीक्षण ऐन, २०७५ को दफा २० (२) बमोजिम सम्बन्धित स्थानीय तहमा अलग अलग लेखापरीक्षण प्रतिवेदन जारी गर्न सक्ने व्यवस्था छ । यस वर्ष ७५३ स्थानीय तहमध्ये आर्थिक वर्ष २०७८\७९ को बक्यौता रहेका २ सहित ७४८ स्थानीय तहको लेखापरीक्षण सम्पन्न गरिएको छ ।