काठमाडाैं- बागलुङ नगरपालिका–९ तित्याङ थापाथरका किसान पदम खत्रीले १२ केजी ८८० ग्राम तौलको विशाल काउली फलाएर सबैलाई चकित पारेका छन्। यसअघि नौ किलो तौलको काउली उत्पादन गरी जिल्लाकै उत्कृष्ट किसान घोषित भएका खत्रीले यसपटक आफ्नै रेकर्ड तोड्न सफल भएका हुन्।

विसं २०६६ मा एउटा सानो प्लास्टिक टनेलबाट व्यावसायिक तरकारीखेती सुरु गरेका खत्री अहिले यस क्षेत्रकै सफल किसानका रूपमा स्थापित भइसकेका छन्। आफ्ना सहकर्मीहरू वैदेशिक रोजगारीतर्फ आकर्षित भइरहेका बेला उनले गाउँमै सम्भावनाको खोजी गरे र स्वदेशमै समृद्धि हासिल गर्न सकिन्छ भन्ने उदाहरण प्रस्तुत गरे।

खत्री अहिले १८ रोपनी जग्गामा व्यावसायिक तरकारीखेती गरिरहेका छन्। त्यसमध्ये आठ रोपनी जग्गा भाडामा लिएको छ भने पाँच रोपनी बाँझो जमिनलाई सदुपयोग गर्दै उत्पादन विस्तार गरेका छन्। फार्ममा आठवटा प्लास्टिक टनेल छन्, जसमध्ये दुईवटा हाइटेक प्रविधियुक्त छन्।

उत्पादन वृद्धि गर्दै लगेपछि खत्रीले यस वर्ष मात्रै १० क्विन्टल काउली र ब्रोकाउली बिक्री गरिसकेका छन्। उनको वार्षिक आम्दानी रु १० देखि १२ लाखसम्म पुगेको छ। कृषि ज्ञान केन्द्र र बागलुङ नगरपालिकाको प्राविधिक सहयोगमा आफू सफल हुन सकेको खत्री बताउँछन्।

उनीजस्तै अन्य किसानलाई प्रेरित गर्न खत्रीले आफ्ना अनुभवहरू बाँड्ने गरेका छन्। मेहनत, सही प्रविधि र योजनाबद्ध खेती प्रणाली अपनाएमा गाउँमै पनि राम्रो आम्दानी गर्न सकिने उनको विश्वास छ।