काठमाडौँ- ललितपुरस्थित एभरेष्ट इन्जिनियरिङ कलेज (EEC) मा आयोजना गरिएको ‘AI–Enabled Digital Pedagogy’ विषयक तीन दिने कार्यशाला आज सफलतापूर्वक सम्पन्न भएको छ। वैशाख ०८ देखि १० गतेसम्म सञ्चालन भएको उक्त कार्यशालाले कलेजका सम्पूर्ण शिक्षकहरूलाई कृत्रिम बुद्धिमत्ता (AI) र आधुनिक डिजिटल शिक्षण प्रविधिमा दक्ष बनाउने उद्देश्यका साथ सञ्चालन गरिएको थियो ।

कार्यशालाको मूल उद्देश्य परम्परागत शिक्षण पद्धतिलाई रूपान्तरण गर्दै प्रविधिमैत्री, नवप्रवर्तनमुखी तथा विद्यार्थी–केन्द्रित बनाउनु रहेको थियो । कार्यक्रममा सहभागी सम्पूर्ण शिक्षकहरूले AI–आधारित टुलहरू, डिजिटल प्लेटफर्महरू तथा आधुनिक शिक्षण विधिहरूको प्रयोगबारे व्यवहारिक ज्ञान हासिल गरेका छन्, जसले उनीहरूलाई “एआई दिक्षित” शिक्षकका रूपमा विकास गर्न महत्वपूर्ण भूमिका खेलेको छ ।

तीन दिनसम्म सञ्चालन भएको कार्यशालामा पहिलो दिन डिजिटल पेडागोजीको आधारभूत अवधारणा, शिक्षण क्षेत्रमा AI को भूमिका, तथा नयाँ प्रविधिसँग अनुकूलन हुने रणनीतिहरूमा केन्द्रित सत्रहरू सञ्चालन गरिएका थिए । दोस्रो दिन डिजिटल कन्टेन्ट निर्माण, इन्टरएक्टिभ शिक्षण विधि तथा विद्यार्थी सहभागिता अभिवृद्धि गर्ने उपायहरूबारे अभ्यासमुखी तालिम दिइएको थियो ।

अन्तिम दिन AI–सहयोगी मूल्याङ्कन प्रणाली, डेटा–आधारित शिक्षण प्रक्रिया तथा भविष्यको स्मार्ट कक्षाको अवधारणाबारे विस्तृत छलफल गरिएको थियो । कार्यक्रमभरि सहभागी शिक्षकहरूले समूहगत अभ्यास, केस स्टडी तथा प्रत्यक्ष प्रयोगमार्फत सिकाइलाई व्यवहारमा उतार्ने अवसर प्राप्त गरेका थिए । अन्तरक्रिया सत्रहरूमा उनीहरूले आफ्ना अनुभव, चुनौतीहरू तथा सम्भावित समाधानहरूबारे सक्रिय रूपमा विचार आदानप्रदान गरेका थिए, जसले कार्यक्रमलाई अझ प्रभावकारी बनाएको थियो ।

कार्यक्रमको समापन अवसरमा कार्यक्रम संयोजक तथा सह–प्राचार्य राजन लामाले यस कार्यशालाले शिक्षण प्रणालीमा गुणात्मक परिवर्तन ल्याउने विश्वास व्यक्त गर्दै प्राप्त ज्ञानलाई व्यवहारमा रूपान्तरण गर्न शिक्षकहरूलाई प्रेरित गरे । त्यसैगरी, कलेजका प्राचार्य प्रा. डा. हरिकृष्ण श्रेष्ठले डिजिटल युगअनुसार शिक्षण पद्धतिमा परिवर्तन अपरिहार्य भएको उल्लेख गर्दै यस्ता कार्यक्रमहरूले संस्थालाई अझ अग्रगामी बनाउने धारणा राखेका छन् । साथै, कलेजका सिइओ अरुणकुमार भण्डारीले आधुनिक प्रविधिसँग शिक्षणलाई समायोजन गर्दै अन्तर्राष्ट्रिय स्तरको शिक्षा प्रदान गर्ने दिशामा कलेज निरन्तर अग्रसर रहेको बताउँदै आगामी दिनहरूमा यस्ता पहलहरू अझ विस्तार गरिने प्रतिबद्धता व्यक्त गरे ।

कलेज प्रशासनका अनुसार यस कार्यशालामार्फत शिक्षकहरूलाई डिजिटल युगअनुसार अद्यावधिक गराउँदै शिक्षण गुणस्तर अभिवृद्धि गर्ने लक्ष्य हासिल गरिएको विश्वास व्यक्त गरिएको छ । साथै, भविष्यमा पनि यस्ता नवप्रवर्तनमुखी कार्यक्रमहरू निरन्तर सञ्चालन गरिने जनाइएको छ, जसले विद्यार्थीहरूलाई अन्तर्राष्ट्रिय स्तरको शिक्षा प्रदान गर्न सहयोग पु¥याउने अपेक्षा गरिएको छ ।

तीन दिने कार्यशाला प्रत्येक दिन बिहान ११ः०० बजेदेखि दिउँसो २ः३० बजेसम्म सञ्चालन भएको थियो। कार्यक्रमको समापन समारोहमा सहभागी शिक्षकहरूलाई प्रमाणपत्र प्रदान गर्दै औपचारिक रूपमा समापन गरिएको थियो ।