काठमाडौं- गत शुक्रबार ठूलो गिरावट आएको सुनको मूल्य आज पुनः बढेको छ। नेपाल सुनचाँदी व्यवसायी महासंघका अनुसार आइतबार सुनको भाउ प्रतितोला ६ सय रुपैयाँले बढेर २ लाख ८७ हजार ३ सय रुपैयाँ पुगेको छ।

यसअघि शुक्रबार सुनको मूल्य प्रतितोला १० हजार ५ सय रुपैयाँले घटेर २ लाख ८६ हजार ७ सय रुपैयाँमा झरेको थियो। बिहीबार भने सुन प्रतितोला २ लाख ९७ हजार २ सय रुपैयाँमा कारोबार भएको थियो।

त्यस्तै, चाँदीको मूल्य पनि आज बढेको छ। महासंघका अनुसार चाँदी प्रतितोला ५० रुपैयाँले महँगिएर ४ हजार ६ सय ९० रुपैयाँ पुगेको छ। शुक्रबार चाँदीको भाउ ३०५ रुपैयाँले घटेर ४ हजार ६ सय ४० रुपैयाँमा झरेको थियो।

नेपाली बजारमा सुनको मूल्य हालसम्मकै उच्च स्तर गत माघ १५ गते पुगेको थियो। उक्त दिन सुनको भाउ एकैदिन २० हजार ५ सय रुपैयाँले बढेर प्रतितोला ३ लाख ३९ हजार ३ सय रुपैयाँ पुगेको थियो, जुन अहिलेसम्मकै उच्च मूल्य हो।

त्यसैगरी चाँदीको मूल्य पनि माघ १५ गते प्रतितोला ७ हजार ५०५ रुपैयाँ पुगेर कीर्तिमानी स्तरमा पुगेको थियो। माघ १८ गते भने चाँदीको मूल्य एकैदिन १ हजार ५ सय ६५ रुपैयाँले घटेको थियो, जुन हालसम्मकै सबैभन्दा ठूलो गिरावट मानिएको छ।

अन्तर्राष्ट्रिय बजारमा हुने मूल्य उतारचढावको प्रभाव नेपाली बजारमा पनि प्रत्यक्ष पर्ने भएकाले सुनचाँदीको भाउ दैनिक रूपमा परिवर्तन हुँदै आएको छ।