काठमाडौँ- अर्थमन्त्री डा स्वर्णिम वाग्लेले प्रवासमा रहेका नेपालीलाई नेपालमा ढुक्क भएर लगानी गर्नका लागि आह्वान गरेका छन् । चीनको ग्वाङ्झाउ सहरमा भएको गैरआवासीय नेपाली सङ्घ (एनआरएनए ( को ११औँ एसिया प्यासेफिक सम्मेलनलाई भिडियो सन्देशमार्फत नेपालमा लगानीको वातावरण बन्दै गइरहेकाले ढुक्क भएर लगानी गर्नका लागि अनुरोध गरेका थिए । 

अर्थमन्त्री वाग्लेले सम्मेलनलाई सम्बोधन गर्ने क्रममा भनेका छन “सरकारले लगानीको माहोल बनाइरहेको छ । देशमै रोजगारीको वातावरण सिर्जना गर्ने वातावरण भइरहेको छ ।  एआई र सूचना प्रविधि क्षेत्रमा काम गर्न प्रोत्साहन गर्ने गरी नीतिगत रणनीतिहरू कार्यान्वयन भइरहेको छ । त्यसैले पनि नेपालमा ढुक्क भएर लगानी गर्न प्रवासी नेपालीहरूलाई आग्रह गर्दछु ।” उनले थप भने “प्रवासी साथीहरू, अब नेपाल आएर ढुक्कसँग नेपालमा लगानी गर्नुहोस् । पर्यटन, सूचना प्रविधि क्षेत्रमा, हरित ऊर्जा, उच्च मूल्ययुक्त कृषिमा र आयात प्रतिस्थापन हुने क्षेत्रमा लगानी गर्नुहोस् ।  सरकारले नतिजा देखिने गरी तीव्र गतिमा काम गरिरहेको छ । बजेटबाट २७ वटा नयाँ कानुनी ऐन ल्याएर लगानीमैत्री वातावरण बनाउन सरकारले काम गरिरहेको छ ।’’
मन्त्री वाग्लेले यसो भने पनि देशभित्र लगानीको वातावरण नबनेको गैर आवासीय नेपालीहरुको गुनासो रहेको छ । सरकारले लिएका आर्थिक नीतिहरु लगानीमैत्री नभएको सरोकारवालाहरुको दाबी छ । अर्को कुरा उद्यमीहरुको सुरक्षाको विषयमा पनि सरकारले विश्वास दिलाउन नसकेको बताइन्छ । सुन्ने र थुन्ने कानुनको प्रचलित मान्यता विपरित गएर नयाँ सरकारले पहिले थुन्ने अनि सुन्ने नीति अपनाएको देखिन्छ । यसले गर्दा व्यवसायी तथा उद्यमीहरु ढुक्क भएर लगानी गर्न सकिरहेका छैनन् । राज्यका निकायहरुले ऐन नियमले परिभाषित कामहरु नगरेर  मनोमानी ढंगले काम गरेर व्यवसायीहरुलाई दुख दिएको व्यापक गुनासो आएको पाइन्छ । जस्तो बैंकहरुको समस्या राष्ट्रबैंकले गर्ने कि प्रहरीले गर्ने भन्ने विषय अहिले पनि उठिरहेको छ । सरकार प्रतिशोधमा उत्रेको हो कि भन्ने प्रश्न पनि उठिरहेको छ । त्यसैले लगानी भित्राउनको लागि सबैभन्दा पहिले सरकारले विश्वासको वातावरण सिर्जना गर्न जरुरी छ ।