हलेसी तुवाचुङ नगरपालिका–५ दुर्छिमस्थित छापडाँडाबाट  खोटेहाङ गाउँपालिका–९ लिच्कीराम्चेकोे रसुवाघाटसम्म पहिलो पटक बस सेवा सञ्चालनमा ल्याइएको छ ।  दशै÷तिहार पर्वको अवसर पारेर आफ्नो घर आवतजावत गर्ने सर्वसाधारणको समस्यालाई मध्यनजर गर्दै आइतबारदेखि नियमित बस सेवा सञ्चालनमा ल्याइएको हो । 

हलेसी तुवाचुङ–११ राजापानीको भाडबेँसीमा आयोजित कार्यक्रममा स्थानीय ९९ वर्षीया तुलसा बुढाथोकी, नगरप्रमुख इवन राई र उपप्रमुख विमला राईले बस सेवाको औपचारिक शुभारम्भ गरेका थिए ।

छापडाँडाबाट–हलेसी–धितुङ–भाडबेँसी–रेग्मीटार–भण्डारेघाट–रमाईलो हुँदै रसुवाघाटसम्म खोटाङ यातायात प्रा।लि।को बस सञ्चालन हुने जनाइएको छ । 

छापडाँडाबाट दैनिक बिहान ६ बजे र रसुवाघाटबाट छापडाँडाका लागि दैनिक बिहान साँढे ११ बजे नियमित बस छुट्ने कार्यतालिका निर्माण गरिएको खोटाङ यातायात प्रा।लि।का वरिष्ठ उपाध्यक्ष टेकेन्द्र राईले जानकारी दिए। छापडाँडाबाट रसुवासम्मका लागि रु ४५० भाडा निर्धारण गरिएको यातायात प्रा।लि।ले जनाएको छ । 

खोटाङ र उदयपुरको सीमानामा पर्ने फोक्सिङटारस्थित सुनकोशी नदीमा अस्थायी बेलिब्रिज जडान भएपछि छापडाँडा–गाईघाट सिधा बस सञ्चालन गरिने जनाएको छ । हालै निर्माण सम्पन्न गरिएको उक्त सडक खण्डमा बस सेवा सञ्चालन भएपछि स्थानीय बासिन्दा हर्षित भएका छन् । 

यातायात सञ्चालन नहुँदा कठिन यात्रा गरिरहेका सर्वसाधरणलाई उक्त सडक खण्डमा नियमित यातायात सञ्चालन भएपछि यात्रा सहज भएको छ । दैनिक बस सेवा शुरु भएपछि स्थानीय बासिन्दाले उत्पादन गरेका अन्नबाली, फलफूल लगायत बाहिर निर्यातसमेत हुने अपेक्षा गरिएको छ । 

दश स्थानीय तह रहेको जिल्लाका अन्य ग्रामिण सडक पनि दशैँअघि सञ्चालनमा ल्याउने तयारी गरिएको छ । जिल्लाका सबै स्थानीय तहले अहिले अवरुद्ध सडक खुलाउनका लागि मर्मतको कामलाई तीव्रता दिएका छन् । 

दुई नगरपालिका र आठ गाउँपालिका रहेको जिल्लाका सबै ग्रामिण सडकमा करीब छ महिनामात्र यातायात सञ्चालन हुने गरेको छ । भर्खरै कालोपत्रको काम सम्पन्न गरेर सञ्चालनमा ल्याइएको मध्यपहाडी लोकमार्ग अन्तरगत पर्ने दिक्तेल–हलेसी सडक खण्डमा मात्रै बाह्रै महिना नियमित यातायात सञ्चालन हुने गरेको छ ।