काठमाडौँ- राजकुमार ह्यारीको आत्मकथा ‘स्पेयर’ बेलायतमा सबैभन्दा छिटो बिक्री हुने नन–फिक्सन पुस्तक बनेको छ । १० जनवरीमा रिलिजको पहिलो दिनमा ४ लाख प्रति बिक्री भएको छ । यसमा प्रिन्टेड बुकका साथै इ–बुक र अडियो बुक पनि समावेश छ ।

यस पुस्तकमा बेलायती शाही परिवारका रहस्य र विवादहरू उल्लेख गरिएका छन् । राजकुमार ह्यारी इङ्गल्याण्डका राजा चार्ल्सका कान्छा छोरा हुन् । उनले २०२० मा आफ्नी पत्नी मेगनसँग शाही परिवार छोडेका थिए । अब उनले आफ्नो आत्मकथामा बाल्यकालदेखि राजपरिवार छोडेसम्मका घटनाक्रमको विस्तृत विवरण दिएका छन् ।

आधा मूल्यमा किताब बिक्यो, लाग्यो लामो लाइन

बेलायतको शाही परिवारको राज खुलासा गर्ने यस पुस्तकका धेरै अंश यसअघि नै मिडियामा बाहिरिएका छन् । त्यसैले यो किताब पढ्न मानिसहरु निकै उत्साहित छन् । मंगलबार, बेलायतका पुस्तक पसलहरू निर्धारित समयभन्दा अगाडि खुले र पुस्तक बिक्री सुरु भयो । दिनभर पुस्तक पसलमा मानिसको लामो लाइन देखिएको थियो ।

स्पेयरको मूल्य करिब ४५ सय रुपैयाँ थियो तर पुस्तक पसलमा आधा मूल्यमा बिक्री भइरहेको छ । यो करिब २८ सय रुपैयाँमा उपलब्ध छ ।
पहिलो दिन ह्यारी पोटर बुकमात्रै यति धेरै बिक्रि भएको थियो

पुस्तकको प्रकाशक पेन्गुइन र्‌यान्डम हाउसका प्रबन्ध निर्देशक ल्यारी फिनलेले भने, ‘हामीलाई यो पुस्तक धेरै बिक्री हुने थाहा थियो, तर यति धेरै बिक्री होला भनेर कल्पना पनि गरेका थिएनौँ । हाम्रो जानकारी अनुसार, ह्यारी पोटरका पुस्तकहरू मात्र रिलीजको पहिलो दिनमा यति धेरै बिक्री भएका छन् ।’